काठमाडौं ।
क्वालकमले बुधबार पीसी र फोनका लागि नयाँ चिप्स सार्वजनिक गरेको छ, जसमा व्यवसायका लागि नयाँ सुरक्षा सुविधा भएको पीसी चिप पनि समावेश छ। विश्लेषकहरूले यो सुविधा आफ्नो किसिमकै पहिलो भएको बताएका छन्।
सान डिएगोस्थित क्वालकम विश्वकै ठूलो मोबाइल चिप्स विक्रेतामध्ये एक हो, जसले फोनलाई वायरलेस डाटा नेटवर्कसँग जोड्ने काम गर्छ। तर पछिल्ला दुई वर्षदेखि कम्पनीले पीसी बजारमा प्रवेश गर्दै आएको छ, जहाँ उसले एपलसँग प्रतिस्पर्धा गर्दै विण्डोज अपरेटिङ सिस्टममा चल्ने ल्यापटप र पीसीका लागि ऊर्जा–दक्ष चिप्स बेच्ने प्रयास गरिरहेको छ।
रोयटर्सका अनुसार क्वालकमको नयाँ ल्यापटप चिप ‘स्न्यापड्रागन एक्स२ एलाइट’ आउँदो वर्षदेखि उपलब्ध हुने बताइएको छ। यसमा ‘गार्डियन’ नामक नयाँ सुविधा थपिएको छ, जुन डेस्कटप र ल्यापटप किन्ने ठूला व्यवसायिक ग्राहकका लागि लक्षित गरिएको हो।
क्वालकमका गेमिङ र कम्प्युट विभागका वरिष्ठ उपाध्यक्ष केदार कोंडापले बुधबार प्रस्तुतिमा बताएअनुसार, यो सुविधा प्रयोग गरी व्यवसायिक सूचना प्रविधि विभागले कम्प्युटर अफ भए पनि सुरक्षित रूपमा अपडेट गर्न वा प्रविधि सहयोग उपलब्ध गराउन सक्नेछन्।
इण्टेलले व्यवसायिक कम्प्युटर व्यवस्थापनका लागि यस्तै सुविधा दशकभन्दा बढी समयदेखि उपलब्ध गराउँदै आएको छ। तर क्वालकमले आफ्नो सुरक्षा सुविधालाई ५जी र मोबाइल नेटवर्कसँग जोडिने मोडेम चिप्ससँग संयोजन गर्ने योजना बनाएको छ, जसले गर्दा कम्प्युटरको मालिकले विश्वकै जुनसुकै स्थानमा मोबाइल नेटवर्कको पहुँच भएमा आफ्नो उपकरणको निगरानी गर्न सक्नेछन्।
“यस किसिमको सुविधा अरू कसैले दिन सक्दैन,” प्राविधिक परामर्श संस्था क्रियटिभ स्ट्राटेजीजका प्रमुख कार्यकारी बेन बजरिनले भने। “यो धेरैजसो कर्मचारीका लागि उपयोगी हुन सक्छ र यसले व्यवसायिक क्षेत्रमा क्वालकमप्रति अझै बढी चासो बढाउनेछ।”
प्रकाशित: ११ आश्विन २०८२, शनिबार
