फेसबुक डेटिङमा एआई असिस्टेन्ट ल्याउने मेटाको घोषणा

काठमाडौं ।

मेटाले फेसबुक डेटिङमा एआई असिस्टेन्ट ल्याउने भएको सोमबार घोषणा गरेको छ।

यो च्याटबोट प्रयोगकर्ताले खोजिरहेका व्यक्तिहरूसँग बढी मेल खाने प्रोफाइल फेला पार्न सहयोग गर्ने उद्देश्यले ल्याइिएको हो। उदाहरणका लागि, प्रयोगकर्ताले “टेक क्षेत्रमा काम गर्ने ब्रुकलिनकी केटी” खोज्न वा आफ्नो प्रोफाइल सुधार गर्न एआईलाई भन्न सक्नेछन्।

रोयटर्सका अनुसार मेटाले “स्वाइप गर्दा हुने थकान” कम गर्न मीट क्युट नामक नयाँ सुविधा पनि ल्याएको छ। यसमार्फत प्रयोगकर्तालाई हप्तामा एकपटक एल्गोरिदमको आधारमा “सरप्राइज म्याच” दिइनेछ।

कम्पनीका अनुसार फेसबुक डेटिङ प्रयोग गर्ने १८ देखि २९ वर्षका बीचका वयस्कहरूमा म्याच १० प्रतिशतले बढेको छ। हरेक महिना यस उमेर समूहका सयौं हजार प्रयोगकर्ताले फेसबुक डेटिङ प्रोफाइल बनाइरहेका छन्। तर यो अझै पनि प्रतिस्पर्धी टिन्डर र हिन्जभन्दा सानो छ।

टिन्डरका दैनिक करिब ५ करोड सक्रिय प्रयोगकर्ता छन् भने हिन्जका १ करोड।

मुख्यधारा डेटिङ एपहरूमा एआई सुविधा सामान्य भइसकेको छ। नयाँ डेटिङ एप स्टिचले पनि एआई सुविधाको प्रयोग गरेर आफूलाई फरक देखाउने प्रयास गरेको छ।

टिन्डर, हिन्ज, ओकेक्युपिडलगायत एप सञ्चालन गर्ने म्याच ग्रुपले गत वर्ष ओपनएआईसँग साझेदारी गरेको थियो। यसलाई कम्पनीले एआई क्षेत्रमा गरेको २ करोड डलरभन्दा बढीको लगानीको हिस्सा मानिएको छ। पछिल्ला पाँच वर्षमा करिब ६८ प्रतिशत शेयर मूल्य गुमाएको म्याच ग्रुपका लागि यो ठूलो जोखिम हो।

यस लगानीबाट हालसम्म टिन्डरमा एआई फोटो छनोट गर्ने सुविधा थपिएको छ, जसले प्रयोगकर्ताको क्यामेरा रोल स्क्यान गरेर प्रोफाइल फोटो छान्न सहयोग गर्छ। साथै, एआई–सक्षम म्याचिङ सुविधा पनि उपलब्ध छ। हिन्जले प्रयोगकर्ताले प्रोफाइलका प्रश्नहरूको जवाफ सुधार गर्न एआई प्रयोग गर्ने सुविधा ल्याएको छ।

बम्बलले पनि यस्तै एआई सुविधा थपेको छ। यसको संस्थापक व्हिटनी वोल्फ हर्डले गत वर्ष भविष्यमा प्रयोगकर्ताले व्यक्तिगत “एआई कन्सिएर्ज” पाउन सक्ने र ती एआईले एकअर्कासँग डेट गरेर वास्तविक व्यक्तिको मिल्दोपन निर्धारण गर्ने सुझाएका थिए।