जापानले सञ्चालनमा ल्यायो आफ्नै उपकरण प्रयोग गरेर डिजाइन र निर्माण गरिएको पहिलो क्वान्टम कम्प्युटर

क्वान्टम कम्प्युटिङलाई कम्प्युटिङको नयाँ सीमाको रूपमा हेरिन्छ। यसले विश्वकै शक्तिशाली सुपरकम्प्युटरलाई पनि उछिन्न सक्ने र आजको प्रविधिले सम्भव नभएका जटिल गणना र सिमुलेसन गर्न सक्ने अपेक्षा गरिएको छ।

वैज्ञानिकहरूको अनुमानमा यस प्रविधि औषधि खोज, शहरी यातायात व्यवस्थापन, ढुवानी कम्पनीका लागि सर्वोत्तम मार्ग पत्ता लगाउन लगायतका क्षेत्रमा उपयोगी हुन सक्छ।

यसले गणना अनुक्रमिक नभई समानान्तर रूपमा गर्ने भएकाले बढी क्युबिट थपिँदा प्रणाली अझ शक्तिशाली हुन्छ। तर धेरै क्युबिट थप्दा हुने उच्च त्रुटि दरलाई कम गर्ने चुनौती अझै बाँकी छ। यही कारण अहिले धेरै अनुसन्धान ‘क्वान्टम त्रुटि सुधार’ मा केन्द्रित भएको छ।

जापानको पहिलो क्वान्टम कम्प्युटरलाई ओसाकामा साउन २९ देखि भदौ ४ सम्म आयोजित एक्स्पो २०२५ मा प्रदर्शनी गरिएको थियो। प्रदर्शनीमा यसको प्रमुख उपकरणहरू देखाइएका थिए।

आगन्तुकहरूले क्लाउडमार्फत प्रणालीमा जडान भएर साधारण क्वान्टम प्रोग्राम चलाउन सकेका थिए। त्यस्तै क्वान्टम एन्ट्याङ्गलमेन्टलगायतका घटनाहरू बुझ्न अन्तरक्रियात्मक सुविधा पनि राखिएको लाइभसाइन्सले उल्लेख गरेको छ।