स्वास्थ्य मन्त्री पौडेलको डिजिटल हेल्थ प्रगतिः विद्युतीय चिकित्सा अभिलेखदेखि डिजिटल रिपोर्टसम्म

काठमाडौं ।

स्वास्थ्य तथा जनसंख्या मन्त्रालय मन्त्री प्रदिप पौडेलले नेतृत्वमा रहेर गत एक वर्षमा गरेका प्रयासहरूबाट हासिल भएका उपलब्धिहरू र आगामी दिशानिर्देश सार्वजनिक गरेका छन्।

उनले सोमबार सार्वजनिक गरेका एक वर्षको कार्यकालका उपलब्धिहरु मध्ये डिजिटल हेल्थलाई समेत प्राथमिकतामा राखिएको बताए।

मन्त्री पौडेलकाअनुसार बिरामीको परीक्षण नदोहोरियोस् भन्नका लागि एकीकृत विद्युतीय चिकित्सा अभिलेख प्रणाली लागू गर्ने तयारीस्वरूप निर्देशिका जारी गरिएको छ भने विद्युतीय स्वास्थ्य अभिलेखनका लागि Central Data Repository System/ EHR लागू गरिएको छ।

“देशभरका ११,२३७ स्वास्थ्य संस्था र करिब ४० हजार स्वास्थ्यकर्मीलाई राष्ट्रिय स्वास्थ्य संस्था एवं स्वास्थ्यकर्मी पञ्जीकरण प्रणालीमा आबद्ध गरिएको छ,” उनले जानकारी दिए, “चालू आ. व. मा २२ संघीय अस्पतालमा एक्स रे फिल्म लगायतका प्रतिवेदन विस्थापन गरी डिजिटल रिपोर्ट उपलब्ध गराउने व्यवस्था मिलाईएको उनले जानकारी दिएका छन्।”

यस्तै, स्वास्थ्य सेवा विभाग अन्तर्गतको औषधि औजार र उपकरणसम्बन्धी अभिलेख व्यवस्था प्रणालीलाई एकीकृत तथ्यांक प्राप्त गरी आर्थिक भार समेत कम गर्न ईएलएमआईएस (ELMIS) बाट सार्वजानिक सम्पत्ति व्यवस्थापन सूचना प्रणालीमा स्थानान्तरण गरिएको छ।

साथै, पेसेन्ट पोर्टल Patient Portal र हेल्थ आईडी (Health ID) लागू गर्ने गरी प्रणाली विकास सम्बन्धीको तयारी अन्तिम चरणमा रहेको छ।

जनताको स्वास्थ्य जस्तो संवेदनशील विषयमा दीर्घकालीन सोच राख्नु अपरिहार्य छ भन्ने कुरालाई मनन गर्दै ती मध्ये दीर्घकालीन महत्व राख्ने र राष्ट्रिय गौरवसँग जोडिएका विषयवस्तु तथा कार्यक्रमहरूलाई चालु आर्थिक वर्ष २०८२/०८३ को वार्षिक बजेट तथा कार्यक्रममा समेत समावेश गरी निरन्तरता दिएको स्वास्थ्य मन्त्री पौडेलले बताए।