सामसङले ग्यालेक्सी एस२६ प्लसलाई एस२६ एजले प्रतिस्थापन गर्ने

काठमाडौं ।

सामसङले वर्षौंपछि पहिलो पटक आफ्नो प्रमुख ग्यालेक्सी एस लाइनअपबाट “प्लस” मोडेललाई त्याग्ने तयारी गरिरहेको हुन सक्ने उल्लेख गरिएको छ।

कोरियाली आउटलेट द इलेकको नयाँ रिपोर्टले सामसङले हाल ग्यालेक्सी एस२६ सिरिजका लागि तीनवटा फोनहरू तयार गरिरहेको दावी गरेको छ। यद्यपि, ती मध्ये कुनैमा पनि परिचित “प्लस” ब्राण्डिङ छैन।

लाइनअपमा मानक ग्यालेक्सी एस२६, नयाँ ग्यालेक्सी एस२६ एज र हाइ–इण्ड ग्यालेक्सी एस२६ अल्ट्रा समावेश हुने अपेक्षा गरिएको छ। त्यसैले अब प्लस मोडेललाई पातलो र स्लिम एज फोनले प्रतिस्थापन गर्ने सम्भावना रहेको उल्लेख गरिएको छ।

सन् २०२६ मा सामसङ ग्यालेक्सी एस२६ प्लस नहुनेः

सामसङले सन् २०२५ को मे महिनामा आफ्नो एस सिरिजको नयाँ मोडेलको रूपमा ग्यालेक्सी एस२५ एज प्रस्तुत गरेको थियो। त्यतिबेला, यो एक प्रयोग जस्तो देखिन्थ्यो र सम्भवतः स्लिम फोनहरूप्रति उपभोक्ता प्रतिक्रिया मापन गर्न परीक्षण गरिएको हुन सक्ने बताइएको छ।

तर अब, एज फोनले प्लस मोडेललाई पूर्ण रूपमा प्रतिस्थापन गर्नको लागि अगाडि बढिरहेको हुन सक्ने उल्लेख गरिएको छ।

लीकका अनुसार, ग्यालेक्सी एस२६ मा ६.२७ इन्चको स्क्रिन हुनेछ भने एज संस्करणको स्क्रिन ६.६६ इन्चमा बढाइने र अल्ट्रामा ठूलो ६.८९ इन्चको स्क्रिन समावेश गरिने छ।

यी तथ्याङ्कहरू पहिले नै उत्पादनमा रहेका प्यानल अर्डरहरूमा आधारित रहेको र यसले सामसङको अन्तिम योजनाहरू लक इन हुने नजिक रहेको सुझाव दिएको बताइएको छ।

यदि यो कुरा सत्य भयो भने, एजले कम्प्याक्ट बेस मोडेल र ठूलो अल्ट्रा बीचको खाडल भर्दै एस२६ लाइनअपमा बीचको स्लट लिनेछ।

त्यसैगरि, एस२५ सिरिज नियमित एस२५ (६.२–इन्च), एस२५ प्लस (६.७–इन्च), एस२५ एज (६.७–इन्च पनि) र एस२५ अल्ट्रा (६.९–इन्च) गरी चारओटा स्क्रिन साइजहरूमा आउने बताइएको छ। प्लस हटाउनाले चीजहरू अलि सरल हुने उल्लेख गरिएको छ। यो सँगै अब लगभग एक दशकदेखि चलिरहेको ढाँचाको पनि अन्त्य हुने भएको छ।

सामसङले एस२६ सिरिजको बारेमा अहिलेसम्म आधिकारिक रूपमा केही पुष्टि नगरेको भए तापनि यो स्न्यापड्रागन ८ एलिट २ चिपको साथ सन् २०२६ को सुरुमा लन्च हुने गीज्मोचाइले उल्लेख गरेको छ।