यी हुन् जेठ मसान्तसम्मका ‘टप टेन’ आईएसपी: कसले कति ग्राहक थपे, कसले गुमाए?

काठमाडौं ।

नेपालमा पछिल्लो समय इन्टरनेटको प्रयोग बढ्दै गइरहेको छ। व्यक्तिगत मनोरञ्जन वा कार्यालयको काम र अध्ययन अध्यापनमा समेत अपरिहार्य भएकाले इन्टरनेटको प्रयोग बढेको हो।

प्रयोगकर्ताको सङ्ख्या बढेसँगै मोबाइल ब्रोडब्याण्ड लगायत तार (फाइबर)बाट इन्टरनेट जडान गर्नेको संख्या पनि बढ्दो छ।

नेपाल दूरसञ्चार प्राधिकरणले सार्वजनिक गरेको आर्थिक वर्ष २०८१/८२ को एघारौं महिना अर्थात् २०८२ जेठसम्मको एमआईएस प्रतिवेदन अनुसार इन्टरनेट सेवा प्रदायक (आईएसपी) मार्फत इन्टरनेट जडान संख्या ३२ लाख ७ हजार ५९७ पुगेको छ। यो आँकडा अघिल्लो महिना अर्थात् वैशाख मसान्तसम्म ३१ लाख ३२ हजार ३५० थियो। यस हिसाबले एक महिनामा उल्लेख्य ७५ हजार २४७ नयाँ जडान भएको छ।

नेपालमा आधिकारिक रुपमा सञ्चालनमा रहेकामध्ये ग्राहक संख्याको आधारमा नेपालको सबैभन्दा ठूलो इन्टरनेट सेवा प्रदायकको रुपमा वर्ल्डलिंक कम्युनिकेशन प्रालि रहेको छ। जेठमा पनि कम्पनीको यो साख यथावत नै छ।

जेठ मसान्तसम्म वर्ल्डलिंकका ग्राहक १० लाख ७ हजार ७६२ छन्। यो आँकडा वैशाख मसान्तसम १० लाख ३ हजार ९४९ थियो। एक महिनामा वर्ल्डलिंकले ३ हजार ८१३ ग्राहक थपेको छ।

यी हुन्  २०८२ जेठ महिनासम्मका नेपालका टप १० आईएसपी:-

१. वर्ल्डलिंक कम्युनिकेशन्स लिमिटेड

प्राधिकरणले अद्यावधिक गरेको तथ्याङ्क अनुसार २०८२ जेठ मसान्तसम्म वर्ल्डलिंक कम्युनिकेशन्सको इन्टरनेट जडान संख्या १० लाख ७ हजार ७६२ छ। जसमध्ये वायरलेस कनेक्सन ३२६, केवल कनेक्सन २ तथा फाइबर कनेक्सन १० लाख ३ हजार ४३४ छ। १० लाखभन्दा माथि ग्राहकसहित यो कम्पनीले नेपालको शीर्ष कम्पनीको रुपमा निरन्तरता पाएको छ।

२. डिस मिडिया नेटवर्क

डाइरेक्ट टु होम प्रविधिको टेलिभिजन सेवा प्रदायकका रुपमा रहेको डिस मिडिया नेटवर्कले केही वर्षयता मात्र फाइबरमार्फत् इन्टरनेट सेवामा हात हाले पनि छोटो अवधिमै थुप्रै पुराना सेवा प्रदायकलाई पछि पार्दै दोस्रो स्थानमा रहन सफल भएको छ। यो ३ लाख ५६ हजार ७६५ इन्टरनेट जडान संख्या सहित दोस्रो स्थानमा छ। यसले समग्र बजारमा ११.१२ प्रतिशत स्थान ओगटेको छ।

३.  भायानेट कम्युनिकेशन प्रालि

अघिल्लो महिना चौथो नम्बरमा रहेको भायानेट कम्युनिकेशन प्रालिले एकै महिनामा ६९ हजा ८२५ ग्राहक थपेर जेठको इन्टरनेट जडान संख्या ३ लाख १५ हजार ७७० पुर्याउँदै तेस्रो नम्बरमा उक्लिएको छ। यसले बजारको समग्र हिस्साको ९.८४ प्रतिशत ओगटेको छ।

४. सुबिसु केबलनेट प्रालि

अघिल्लो महिना तेस्रो स्थानमा रहेको सुबिसु केबलनेट प्रालि ३ लाख ५ हजार ८४२ जडान संख्यासहित चौथो स्थानमा झरेको छ। जसमध्ये सबै फाइबर कनेक्सन रहेको छ। यो सङ्ख्यासहित सुबिसुले समग्र बजार हिस्साको ९.५३ प्रतिशत ओगटेको छ।

५. क्लासिक टेक प्रालि

क्लासिक टेक प्रालिको इन्टरनेट जडान संख्या १ लाख ८४ हजार ८६१ छ। यसमध्ये ६९९ वायरलेस तथा १ लाख ८२ हजार १६२ फाइबर कनेक्सन रहेको छ। यसले ५.७६ बजार हिस्सा ओगटेको छ।

६. वेबसर्फर नेपाल कम्युनिकेशन सिस्टम 

उत्कृष्ट १० को छैटौं नम्बरमा परेको वेबसर्फर नेपाल कम्युनिकेशन सिस्टम प्रालीको इन्टरनेट जडान संख्या १ लाख ७५ हजार ८८६ छ। यसमध्ये १ लाख ७५ हजार ४६८ फाइबर कनेक्सन छ। ४१८ वायरलेसका ग्राहक रहेका छन्। यसले समग्रमा ५.६२ बजार हिस्सा ओगटेको छ।

७. टेकमाइण्ड्स नेटवर्क प्रालि

सूचीको सातौं नम्बरमा रहेको टेकमाइण्ड्स नेटवर्क प्रालिको इन्टरनेट जडान संख्या ८५ हजार ५१ छ। यसमध्ये वायरलेस कनेक्सन ६६६ तथा फाइबर कनेक्सन ८४ हजार ३८५ छ। टेकमाइण्ड्सले समग्र बजारको २.६५ प्रतिशत हिस्सा ओगटेको छ।

८. सिजी कम्युनिकेसन प्रालि

चितवनमा मुख्य कार्यालय रहेको सिजी कम्युनिकेसन प्रालिको इन्टरनेट जडान संख्या ८१ हजार ७३९ छ। यीमध्ये सबै फाइबर कनेक्सन हो। यो कम्पनीले बजारको २.५५ प्रतिशत हिस्सा ओगटेको छ।

९. वाइफाइ नेपाल प्रालि

उत्कृष्ट १० को नवौँ नम्बरमा परेको वाइफाइ नेपाल प्रालिको इन्टरनेट जडान संख्या ७७ हजार २५२ छ। यसमध्ये सबै  फाइबरका ग्राहक छन्। यसले २.४१ प्रतिशत बजार हिस्सा ओगटेको छ।

१०. ब्रोडलिंक नेटवर्क एन्ड कम्युनिकेशन प्रालि

उत्कृष्ट १० को सूचीमा अन्तिम नम्बरमा पर्न सफल ब्रोडलिंक नेटवर्क एन्ड कम्युनिकेशन प्रालिको इन्टरनेट जडान संख्या ५३ हजार १९२ छ। यसमा ५३ हजार १२० फाइबरमार्फत् सेवा लिने ग्राहकहरु छन् भने बाँकी ७२ वायरलेसका ग्राहक छन्। यसले बजारको १.६६ प्रतिशत हिस्सा ओगटेको छ।