आफ्ना स्मार्टफोनहरुको सफ्टवेयर अपडेट बन्द गर्दै एलजी

काठमाडौं ।

एलजीले आफ्ना फोनहरूको लागि सफ्टवेयर र सुरक्षा अपडेटहरू प्रदान गर्न बन्द गर्ने भएको छ।

एलजीले २०२५ को जुन ३० तारिखदेखि आफ्ना सबै मोबाइल डिभाइसहरूको लागि सफ्टवेयर समर्थन आधिकारिक रूपमा समाप्त गर्ने घोषणा गरेको छ। कम्पनीको उक्त मोबाइल डिभाइसहरूमा एलजी भेलभेट, विङ्गका सागै जी र भि सिरिज जस्ता लोकप्रिय मोडेलहरू समावेश रहेका छन्।

त्यसैगरी युरोपेली बजारको लागि, आधिकारिक सफ्टवेयर समर्थनको अन्त्य साँझ ५ बजेको लागि तय गरिएको बताइएको छ।

एलजी सन् २०२१ मा स्मार्टफोन बजारबाट बाहिरिए पनि कम्पनीले अवस्थित प्रयोगकर्ताहरूलाई सुरक्षा र प्रणाली अपडेटहरू प्रदान गर्न जारी राख्दै आएको थियो।

यो अभ्यास अब आधिकारिक रूपमा समाप्त हुने भएको छ। जुन ३० तारिखपछि हुने परिवर्तनहरू यस्ता छन्ः

• नयाँ प्रणाली र सुरक्षा अपडेटहरू उपलब्ध हुनेछैनन्।
• एलजी अपडेट सेन्टर एप र एलजी ब्रिज टुल बन्द हुनेछ।
• डिभाइस रिसेट भएको अवस्थामा पनि फ्याक्ट्री एपहरू डाउनलोड गर्न सम्भव हुनेछैनन्।

कम्पनीले प्रयोगकर्ताहरूलाई उनीहरूको डिभाइसहरूको अधिकतम स्थिरता र सुरक्षा सुनिश्चित गर्न महिनाको अन्त्यसम्ममा सबै उपलब्ध अपडेटहरू स्थापना गर्नको लागि सल्लाह दिएको छ।

अपडेट बिनाको फोन प्रयोग गर्दा सुरक्षा जोखिम हुन सक्छ भनी विज्ञहरूले चेतावनी दिएका छन् र सक्रिय सफ्टवेयर समर्थन भएका डिभाइसहरूमा स्विच गर्न सिफारिस गरिएको उल्लेख गरिएको छ।

वर्षौंको घाटाको कारणले गर्दा एलजीले आफ्नो मोबाइल फोन डिभिजन बन्द गरेको बताइएको छ। तर वफादार प्रयोगकर्ताहरू र विशिष्ट डिजाइनका कारण कम्पनीको मोडेलहरू बजारमा रहिरहेको टेलिग्राफले रिपोर्ट गरेको छ।