वैशाखमा मोबाइल ब्रोडब्याण्ड प्रयोगकर्ता अढाई लाख माथिले बढे: टेलिकमका बढ्दै, एनसेलका घट्दै

काठमाडौं ।

नेपालमा मोबाइल ब्रोडब्याण्ड इन्टरनेट सेवा चलाउनेको संख्या वैशाख मसान्तसम्म २ करोड ६२ लाख ५२ हजार ४७६ पुगेको छ।

यो सङ्ख्या चालु आर्थिक वर्षको सो अवधिसम्म टुजी, थ्रीजी र फोरजी सेवा लिनेहरु मोबाइल ब्रोडब्याण्ड प्रयोगकर्ताको समग्र आँकडा हो।

हालै नेपाल दूरसञ्चार प्राधिकरणले सार्वजनिक गरेको २०८२ वैशाख मसान्तसम्मको तथ्यांक अनुसार मोबाइल ब्रोडब्याण्ड इन्टरनेट सेवा प्रयोगकर्ताहरुको संख्या अघिल्लो महिना अर्थात् २०८१ चैतको तुलनामा २ लाख ६७ हजार १७४ ले बढेको हो। यो सङ्ख्या चैत मसान्तसम्म २ करोड ५९ लाख ८५ हजार ३०२ रहेको थियो।

२०८२ वैशाख महिनाको समग्र २ करोड ६२ लाख ५२ हजार ४७६ ग्राहकमध्ये नेपाल टेलिकमका समग्र मोबाइल ब्रोडब्यान्ड प्रयोगकर्ताको सङ्ख्या १ करोड ४४ लाख ९७ हजार ३९२ रहेको छ।

यो सङ्ख्यामा टुजीका प्रयोगकर्ता शून्य छ भने थ्रीजीका ७ लाख ५६ हजार ३५६ तथा फोरजीका १ करोड ३७ लाख ४१ हजार ३६ समावेश छन्।

तथ्यांकअनुसार एनसेलका समग्र मोबाइल ब्रोडब्यान्ड प्रयोगकर्ता  १ करोड, १७ लाख, ५४ हजार ७८४ रहेका छन्। यीमध्ये थ्रीजीका प्रयोगकर्ता १ लाख २० हजार ३९७ र फोरजी १ करोड १६ लाख ३४ हजार ३८७ रहेका छन्।

फोरजी: नेपाल टेलिकमले थप्यो, एनसेलले गुमायो 

२०८१ चैत मसान्तको तुलनामा वैशाख मसान्त २०८२ सम्म नेपाल टेलिकमले फोरजी सेवा लिने ग्राहक उल्लेख्य थपेको छ।

फोरजीका हकमा १ महिनामा नेपाल टेलिकमले २ लाख ३७ हजार १७ ग्राहक थपेको छ। एनसेलले भने एक महिनामा ४१ हजार १२० ग्राहक गुमाएको प्रतिवेदनले देखाएको छ।

थ्रीजी: टेलिकमले थप्यो, एनसेलले गुमायो

२०८२ वैशाख महिनासम्ममा नेपाल टेलिकमले आफ्ना थ्रीजी प्रयोगकर्ताको सङ्ख्या अघिल्लो महिनाको तुलनामा ७७ हजार १४ थपेको छ। हाल नेपाल टेलिकमका थ्रीजी प्रयोगकर्ता ७ लाख ५६ हजार ३५६ पुगेका छन्। यो आँकडा २०८१ चैत मसान्तसम्म ६ लाख ७९ हजार ३४२ रहेको थियो।

एनसेलले पनि ६ हजार ३७ ग्राहक गुमाउँदै समग्रमा आफ्ना थ्रीजी प्रयोगकर्ताको सङ्ख्या १ लाख २० हजार ३९७ मा झारेको छ। यो आँकडा २०८१ चैत मसान्तसम्म १ लाख २६ हजार ४३४ रहेको थियो।