इटालीका अनुसन्धानकर्ताहरूले अनावरण गरे विश्वको पहिलो उड्ने ह्युमनोइड रोबोट, अनलाइनमा ट्रोलको विषय

काठमाडौं ।

इटालीका अनुसन्धानकर्ताहरूले पहिलो फ्लाइङ्ग (उड्ने) ह्युमनोइड रोबोट अनावरण गरेका छन्। इटालियन इन्स्टिच्युट अफ टेक्नोलोजीले युट्युबमा आइरनकब एमके३ नामक नयाँ रोबोटको भिडियो साझा गरेको लाइभ साइन्सले उल्लेख गरेको छ।

तर यो ह्युमनोइड रोबोटले आफ्नो लुक्सका कारण इन्टरनेटमा हलचल ल्याएको छ। युट्युबमा साझा गरिएको भिडियो क्लिपमा, बच्चाको अनुहार भएको रोबोटलाई थ्रस्टरहरू प्रयोग गरेर जमिनबाट लगभग २० इन्च माथि उठाउनु अघि सस्पेन्डेड पोजिसन (झुण्डिएको अवस्था) बाट समातेर राखिएको देख्न सकिन्छ।

बच्चाको जस्तो आकार र उपस्थितिमा आधारित रोबोट ३ फिट अग्लो र २२ किलोग्राम तौलको रहेको छ।

यो रोबोट दुई वर्षको अनुसन्धान, परीक्षण र विकासको परिणाम भएको आउटलेटले उल्लेख गरेको छ। यसलाई वास्तविक मानिसहरूले टाढाबाट नियन्त्रण गर्न सक्नेछन्। आईआईटी इन्जिनियरहरूले यो रोबोट उडान भर्न  डिजाइन गरिएको पहिलो यस्तो जेट–सञ्चालित उड्ने ह्युमनोइड रोबोट भएको बताएका छन्।

यो कामले उड्ने ह्युमनोइड रोबोटले प्रस्तुत गर्न सक्ने नयाँ सम्भावनाहरूलाई प्रकाश पार्ने उनीहरूले थप उल्लेख गरेका छन्।

संस्थानका अनुसार, आइरनकब एमके३ “विपद् प्रतिक्रिया जस्ता विशिष्ट प्रयोगहरू” लाई ध्यानमा राखेर विकास गरिएको बताइएको छ। रोबोटको एरियल मोबिलिटी (हवाई गतिशीलता), यसको ग्राउण्ड बेस्ड (जमिन–आधारित) लोकोमोसन (गतिशीलता) र म्यानुपुलेसन (हेरफेर) सँगै, खोज र उद्धार अभियानहरूमा सहयोगको लागि मार्ग प्रशस्त गर्न सक्ने अनुसन्धानकर्ताहरूले विश्वास व्यक्त गरेका छन्।

यस प्रकारको रोबोटले भग्नावशेष हटाउन र पीडितहरूलाई पत्ता लगाउन वा निकाल्न मद्दत गर्न सक्ने अनुसन्धानकर्ताहरूले थप उल्लेख गरेका छन्।

त्यसैगरी अध्ययनका लेखकहरूले उड्ने ह्युमनोइड रोबोटले मानिसहरूलाई पहुँच गर्न गाह्रो संरचनाहरू मर्मत गर्न सक्ने बताएका छन्। तिनीहरूलाई मानिसहरूले सुरक्षित रूपमा खटाउन नसकिने खतरनाक वातावरणमा जस्तै आणविक वा रासायनिक चुहावटको साइटमा पनि तैनाथ गर्न सकिने आउटलेटले रिपोर्ट गरेको छ।

आइरनकब एमके३ विभिन्न परिस्थितिहरूमा बाहिर परीक्षण गरिएको र विण्ड टनेलमा पनि यसको उडान परीक्षण गरिएको बताइएको छ।

सामाजिक सञ्जालमा, रोबोटले मिश्रित प्रतिक्रियाहरू प्राप्त गरेको छ। धेरैले यस रोबोटको बच्चाको अनुहारको मजाक उडाएका छन् भने, अरूले यसको उपस्थितिको बारेमा केही जंगली सिद्धान्तहरू पनि प्रस्ताव गरेका छन्।

“यो धेरै प्रभावशाली छ। तर हे भगवान! त्यो अनुहारमा के हो त्यस्तो? ऊ मेरो आत्मामा हेरिरहेको छ” भनी रेडिटमा एक प्रयोगकर्ताले लेखेको उल्लेख गरिएको छ। “यहाँ प्रदर्शन गरिएको प्रविधि उत्कृष्ट छ, तर यो किन राक्षसको बच्चा जस्तो देखिन्छ?” भनी अर्कोले प्रश्न गरेको एनडीटिभीले रिपोर्ट गरेको छ।