शिवनगर प्राथमिक स्वास्थ्य अस्पतालमा टेलिमेडिसिन सेवा सुरु

काठमाडौं ।

भरतपुर–१४ स्थित शिवनगर प्राथमिक स्वास्थ्य केन्द्रले इन्टरनेटमार्फत एक अस्पतालदेखि अर्को अस्पतालका चिकित्सकसँग समन्वय गरी उपचार गर्ने विधि (टेलिमेडिसिन) सेवा सुरुआत गरेको छ।

कलेज अफ मेडिकल साइन्सेस (सिएमएस)को प्राविधिक सहयोगमा टेलिमेडिसिन सेवा सुरु गरेको हो । शुक्रबार भरतपुर महानगर प्रमुख रेनु दाहालले सेवाको शुभारम्भ गरिन। नियमित चेक जाँच वा जिज्ञासाको लागि डाक्टरको पहुँच उपलब्ध गराउनका लागि सेवा प्रभावकारी हुने अपेक्षा लिइएको छ।

सिएमएसले सामाजिक उत्तरदायित्व बहनअन्तरगत केन्द्रमा टेलिमेडिसिन सेवालाई अघि बढाएको हो।

सो अवसरमा महानगर प्रमुख दाहालले यो सेवाले विपन्न नागरिक र समयको चाप हुने विरामीलाई फलदायी हुने बताइन् । यस अघि हप्ताको ६ दिने विशेषज्ञ सेवा नियमित सञ्चालन गरिने बताइन्।

जनताको स्वास्थ्यभन्दा ठुलो कुरा केही नहुने भन्दै उनले महानगरपालिकाले नगरवासीको स्वास्थ्यका लागि धेरै कार्यक्रकम गर्दै आएको बताइन्। भरतपुर–१४ मा शिक्षक र आयुर्वेद अस्पताल गरी दुई ठुला सङ्घीय अस्पताल बन्न लागेको उल्लेख गरिन। यहाँ ३०० शय्या क्षमताको संघीय शिक्षक अस्पताल र १०० शय्याको आयुर्वेद अस्पताल निर्माणको चरणमा रहेको छ।

शिवनगर स्वास्थ्य केन्द्रलाई नगरस्तरीय अस्पतालको रूपमा घोषणा गरेर सोहीअनुसार काम अघि बढ्ने जानकारी दिए। महानगर उपप्रमुख चित्रसेन अधिकारीले भर्चुअलबाट विशेषज्ञ सेवा गाउँमै पाएसँगै यस क्षेत्रका जनताको स्वास्थ्यका पहुँच बढ्दै जाने बताए। महानगरको गाउँगाउँमा पुगेर सेवा दिने योजनाअनुसार विशेषज्ञ सेवा सुरु भएको उनको भनाइ थियो।

सिएमएसका व्यवस्थापक डा सुदिप केसीले स्वास्थ्य केन्द्रमा टेलिमेडिसिन सेवा सुरु भएसँगै बिरामीलाई सहज हुने उल्लेख गरे। केन्द्रबाट हरेक हप्ताको सोमबार, बुधबार र बिहिबार विशेषज्ञ सेवा प्रदान गरिने छ । पुरानो मेडिकल कलेज र भरतपुर आँखा अस्पतालको समन्वयमा केन्द्रबाट हप्ताको तीन तीन दिन विशेषज्ञ सेवा दिन लागिएको केन्द्रले जनाएको छ।

केन्द्रका अनुसार सोमबार जनरल फिजिसियन, बुधबार प्रसूति तथा स्त्री रोग तथा रेडीयोलोजी सेवा र बिहिबार बाल रोग तथा नेत्र रोगको सेवा दिइने छ। रासस