ह्युस्टन एआई सर्भर बनाउने प्लान्टमा ह्युमनोइड रोबोटहरू तैनाथ गर्न एनभिडिया र फक्सकन बीच वार्ता

काठमाडौं ।

ताइवानको फक्सकन र अमेरिकी आर्टिफिसियल इन्टेलिजेन्स चिप्स निर्माता एनभिडियाले ह्युस्टनको नयाँ फक्सकन कारखानामा ह्युमनोइड रोबोटहरू तैनाथ गर्न वार्ता गरिरहेका छन्। कारखानामा एनभिडिया एआई सर्भरहरू उत्पादन गरिने यस विषयमा जानकार दुई स्रोतहरूले बताएका छन्।

ह्युमनोइड रोबोटहरूको सहयोगमा एनभिडिया प्रोडक्ट बनाइन लागिएको यो पहिलो पटक हुनेछ भने प्रोडक्सन (उत्पादन) लाइनमा तिनीहरूलाई प्रयोग गर्ने फक्सकनको यो पहिलो एआई सर्भर कारखाना हुने स्रोतहरूले बताएको छन्।

आगामी महिनाहरूमा अन्तिम रूप पाउने अपेक्षा गरिएको परिचालनले उत्पादन प्रक्रियाहरूलाई रूपान्तरण गर्ने वाचा गर्दै ह्युम्यान–लाइक रोबोटहरू अपनाउने जनाइएको छ।

फक्सकनले एनभिडियासँग आफ्नै ह्युमनोइड रोबोटहरू विकास गरिरहेको छ र चीनको यूबीटेकद्वारा बनाइएका ह्युमनोइडहरूको पनि परीक्षण गरेको छ। ह्युस्टन कारखानामा कस्तो प्रकारको ह्युमनोइड रोबोटहरू प्रयोगको लागि योजना बनाइएको छ, तिनीहरू कस्तो देखिनेछन् वा सुरुमा कति तैनाथ गरिनेछ भन्ने कुरा स्पष्ट नभएको स्रोतहरूले उल्लेख गरेका छन्।

दुई कम्पनीहरूले अर्को वर्षको पहिलो त्रैमासिकसम्ममा ह्युमनोइड रोबोटहरूलाई काममा लगाउने लक्ष्य राखेको र फक्सकनको नयाँ ह्युस्टन कारखानाले एनभिडियाको जीबी३०० एआई सर्भरहरूको उत्पादन सुरु गर्ने स्रोतहरूले थप उल्लेख गरेका छन्।

तर रोबोटहरूले कारखानामा वास्तवमा के गर्नेछन् भन्ने कुरा भने स्पष्ट नभएको बताइएको छ। मे महिनामा कम्पनीको प्रस्तुतीकरण अनुसार, फक्सकनले उनीहरूलाई वस्तुहरू छान्ने र राख्ने, केबलहरू घुसाउने र एसेम्बली गर्ने काम गर्ने तालिम दिइरहेको जनाइएको छ।

‘फक्सकनको ह्युस्टन कारखाना ह्युमनोइड रोबोटहरू तैनाथ गर्नको लागि आदर्श रूपमा उपयुक्त भएको र यो नयाँ हुनुका साथै अन्य अवस्थित एआई सर्भर निर्माण साइटहरू भन्दा बढी ठाउँ हुनेछ’ भनी एक स्रोतले बताए।

यस बारे एनभिडिया र फक्सकनले भने टिप्पणी गर्न अस्वीकार गरेको रोयटर्सले रिपोर्ट गरेको छ।

त्यसैगरी स्रोतहरूले आफ्नो पहिचान खुलाउन नचाहेको र तिनीहरूलाई मिडियासँग कुरा गर्न अधिकारीक रुपमा स्वीकृति प्राप्त नभएको थप उल्लेख गरिएको छ।

समूहको एआई सर्भर व्यवसायको जिम्मेवारी लिएको फक्सकनको सहायक कम्पनी फक्सकन इन्डस्ट्रियल इन्टरनेटको रोबोटिक्स व्यवसाय एकाइका महाप्रबन्धक लियो गुओले गत महिना ताइपेईमा भएको एक उद्योग कार्यक्रममा फक्सकनले नोभेम्बरमा कम्पनीको वार्षिक प्रविधि कार्यक्रममा विकास गरेको ह्युमनोइड रोबोटका दुई संस्करणहरू प्रदर्शन गर्ने योजना बनाएको बताएका थिए।

ती मध्ये एउटा खुट्टा भएको हुनेछ र अर्कोले पाङ्ग्रा भएको स्वायत्त मोबाइल रोबोट (एएमआर) आधार प्रयोग गर्नेछ भने जसको लागत खुट्टा भएको संस्करण भन्दा कम हुनेछ भनी उनले विवरणहरू खुलासा नगरी बताएको उल्लेख गरिएको छ।

एनभिडियाले गत अप्रिलमा ह्युस्टनमा फक्सकन र डलासमा विस्ट्रोनसँग साझेदारी गर्दै टेक्सासमा एआई सुपर कम्प्युटर उत्पादन कारखानाहरू निर्माण गर्ने योजना बनाएको घोषणा गरेको थियो। साथै दुबै साइटहरूले १२ देखि १५ महिना भित्र उत्पादन बढाउने अपेक्षा गरिएको छ।

एनभिडियाले पहिले नै ह्युमनोइड निर्माताहरूलाई त्यस्ता रोबोटहरू निर्माण गर्न प्रयोग गर्न सकिने प्लेटफर्म प्रदान गर्दै आएको हुनाले एनभिडियाको लागि, यसको एआई सर्भरहरूको निर्माणमा ह्युमनोइड रोबोटहरू प्रयोग गर्नाले प्रविधिमा थप टेवा पुग्ने उल्लेख गरिएको छ।

एनभिडियाका सीईओ जेन्सेन हुआङले निर्माण सुविधाहरूमा रोबोटहरूको व्यापक प्रयोग पाँच वर्षभन्दा कम समय लाग्ने भनी मार्चमा अनुमान गरेको थिए।

जर्मनीको मर्सिडीज–बेन्ज र बीएमडब्ल्यू जस्ता अटोमेकरहरूले उत्पादन लाइनहरूमा ह्युमनोइडहरूको प्रयोगको परीक्षण गरेका छन् भने टेस्लाले पनि आफ्नै विकास गरिरहेको उल्लेख गरिएको छ। चीनले पनि ह्युमनोइडहरूको परीक्षण गरिहेको र धेरै कारखानाका कार्यहरूका लागि अन्ततः त्यस्ता रोबोटहरू प्रयोग गरिने उल्लेख गरिएको छ।