“ऐतिहासिक डाटा लीक” को रूपमा वर्णन गरिएको घटनामा १६ अर्ब एप्पल, फेसबुक र गुगल पासवर्डहरू ‘लीक’

काठमाडौं ।

एप्पल, फेसबुक, गुगल र विभिन्न अमेरिकी सरकारी सेवाहरूको १६ अर्ब पासवर्डहरू अनलाइन प्रकाशित भएका छन्, जसले विश्वव्यापी सुरक्षा चिन्ताहरू जगाएको छ भने विज्ञहरूले यसलाई इतिहासको सबैभन्दा महत्त्वपूर्ण डाटा उल्लङ्घन भनी वर्णन गरेका छन्।

यो ठूलो सुरक्षा डाटा ब्रिच (उल्लङ्घन) ले गुगललाई अरबौं प्रयोगकर्ताहरूलाई तुरुन्तै आफ्नो पासवर्डहरू परिवर्तन गर्न आग्रह गर्न बाध्य पारेको छ।

त्यसैगरी, एफबीआईले अमेरिकीहरूलाई एसएमएस म्यासेजेज (सन्देशहरू) मा शंकास्पद लिङ्कहरू खोल्ने बारेमा चेतावनी जारी गरेको टेलिग्राफले रिपोर्ट गरेको छ।

उल्लङ्घनको अनुसन्धान गर्ने साइबरन्यूजका साइबरसुरक्षा विशेषज्ञहरूले दशौं लाखदेखि ३.५ अर्बभन्दा बढी रेकर्डहरू भएका ३० ओटा खुला डाटासेटहरू पत्ता लगाएको उल्लेख गरिएको छ।

यसको सायद सबैभन्दा चिन्ताजनक कुरा भनेको, यी लगभग सबै खुला डाटासेटहरूमा पहिले रिपोर्ट नगरिएको जानकारी समावेशरहेको र जसले यसलाई पूर्ण रूपमा नयाँ सुरक्षा संकट बनाउने विज्ञहरूले पुष्टि गरेका छन्।

“यो केवल लीक होइन – यो सामूहिक शोषणको योजना हो” भनी अनुसन्धानकर्ताहरूले यस हप्ता फोब्र्सलाई बताएको उल्लेख गरिएको छ।

लीक भएको जानकारीमा मुख्यतया लगइन क्रेडेन्सियल्स र पासवर्डहरूसँग जोडिएका यूआरएलहरू समावेश रहेका छन् जसले सम्भावित रूपमा ह्याकरहरूलाई “एप्पल, फेसबुक र गुगलदेखि गिटहब, टेलिग्राम र विभिन्न सरकारी सेवाहरूसम्म कल्पना गर्न सकिने लगभग हरेक अनलाइन सेवाहरूमा पहुँच प्रदान गर्ने” टेलिग्राफले रिपोर्ट गरेको छ।