अनलाइन जुवा खेल्ने र खेलाउने कार्यमा संलग्न १७ जना पक्राउ

काठमाडौं ।

विभिन्न देशका नागरिकहरूलाई ह्वाटसप र इन्स्टाग्राम मार्फत सम्पर्कमा ल्याई अनलाइन डेटिङ साइटको प्रयोग गरी अनलाइन जुवा (सट्टाबाजी) खेल्ने र खेलाउने कार्यमा संलग्न १७ जनालाई काठमाडौँ उपत्यका अपराध अनुसन्धान कार्यालयको प्रहरी टोलीले पक्राउ गरेको छ।

उक्त कार्य बारेको विशेष सूचना पछि प्रहरीको टोलीले ललितपुर महानगरपालिका २६ स्थित जैनखेल भ्यु टावरमा रहेको घर र ललितपुर १० नख्खु स्थित सनराइज अपार्टमेन्टको फ्ल्याट भाडामा लिई व्यावसायिक रूपमा अनलाइन जुवा खेल्ने र खेलाउने कार्यमा संलग्न ५ जना भारतीय नागरिक र १२ जना नेपाली नागरिकलाई सोमबार पक्राउ गरेको प्रहरी उपरीक्षक काजी कुमार आचार्यले जानकारी दिए।

उनीहरूबाट ल्यापटप तथा मोबाइलहरू बरामद गरेको छ। सोही ल्यापटप र मोबाइलहरूबाट प्रारम्भिक अनुसन्धान गर्दा ८१ करोड ४७ लाख ५७ हजार चार सय छयालिस रूपियाँ बरावरको जुवा कारोबार गरेको देखिएको आचार्यले जानकारी दिए।

दुबईमा बस्ने भारतीयका लागि काम गर्ने एजेन्टहरूले बेटिङबाट हाज/जित भएको रकम बेटिङ एपबाट निकालेर भारतीय नागरिकहरूको बैंक खातामा डिपोजिट समेत गर्दै आएका थिए । उनीहरूले ‘सेभेन इलेभेन ब्याट क्लब’ र ‘युनिकम–३६५’ नामक एपबाट बेटिङ गराउँदै आएका थिए ।

बेटिङ बेटिङ गराएबापत उनीहरूलाई ७० देखि ८० हजार रुपैयाँ तलब दिने गरेको प्रहरीको अनुसन्धानबाट थाहा भएको छ।

पक्राउ परेकाहरूलाई मुलुकी अपराध संहिता, २०७४ को परिच्छेद ५ को दफा १२५ बमोजिमको जुवा खेल्न वा सट्टाबाजी गर्न नहुने कसुरमा थप अनुसन्धान गरी कारबाही अघि बढाइएको जनाएको छ।