भारतीय सरकारी टेलिकम कम्पनी बीएसएनएलले १८ वर्षपछि लगातार दुई त्रैमासिकमा नाफा कमायो

काठमाडौं ।

भारतीय सरकारी दूरसञ्चार कम्पनी भारत संचार निगम लिमिटेड (बीएसएनएल) ले गत आर्थिक वर्षको चौथो त्रैमासिकमा लगभग २८० करोड भारतीय रुपैयाँ खुद नाफा रेकर्ड गरेको छ। बीएसएनएलले लगातार दुई त्रैमासिकमा नाफा हासिल गरेको १८ वर्षपछि यो पहिलो पटक हो। कम्पनीलाई फोरजी सेवाले मोबाइल क्षेत्रमा राजस्व बढाउन मद्दत गरेको एक रिपोर्टमा भनिएको छ।

एक मिडिया रिपोर्टका अनुसार, यो सरकारी दूरसञ्चार कम्पनीले गत आर्थिक वर्षमा लगभग २,२४७ करोड भारतीय रुपैयाँको घाटा बेहोरेको छ। यो कम्पनीको अघिल्लो आर्थिक वर्षमा लगभग ५,३७० करोड रुपैयाँको घाटा भन्दा ५८ प्रतिशत कम हो। बिएसएनएलले गत आर्थिक वर्षमा आफ्नो उच्चतम पूँजीगत खर्च गरेको छ। कम्पनीको ईबीआईटीडीए मार्जिन पनि बढेको छ।

गत आर्थिक वर्षमा, कम्पनीको सञ्चालन राजस्व लगभग ७.८ प्रतिशतले बढेर लगभग भारु २०,८४१ करोड पुगेको छ। अघिल्लो वर्ष, यो लगभग भारु १९,३३० करोड थियो। कम्पनीको इन्टरकनेक्ट युजेज चार्ज (आईयूसी) लगायत मोबिलिटी सेवाहरूबाट हुने राजस्व छ प्रतिशतले बढेर लगभग ७,४९९ करोड भारतीय रुपैयाँ पुगेको छ।

बीएसएनएल वित्तीय स्थितिमा सुधार हुनुको मुख्य कारण लागतमा अनुशासित नियन्त्रण र सञ्चालन दक्षता रहेको बताएको छ।

बीएसएनएलले ४जी नेटवर्क चाँडै पूरा गर्न सक्ने जनाएको छ। यसका लागि ९३,४५० टावरहरू जडान गरिएको छ। यो नेटवर्कलाई स्तरोन्नति गर्ने र ५जी मा रूपान्तरण गर्ने योजना रहेको रिपोर्टमा उल्लेख छ।