टिकटकमा देखा पर्ने मानसिक स्वास्थ्य सम्बन्धी आधा सुझावहरू गलत रहेको अध्ययनको खुलासा

काठमाडौं ।

टिकटकमा मानसिक स्वास्थ्य सम्बन्धी सल्लाह प्रदान गर्ने आधा भन्दा बढी लोकप्रिय भिडियोहरूमा गलत जानकारी समावेश भएको द गार्जियनको एक अध्ययनले पत्ता लगाएको दाबी गरेको छ।

मानसिक स्वास्थ्य सहयोगको लागि मानिसहरू बढ्दो रूपमा सामाजिक सञ्जालतिर बढी आकर्षित भइरहेका छन्। तर तिनीहरूमध्ये धेरैले गलत जानकारी फैलाइरहेको अनुसन्धानले पत्ता लगाएको रिपोर्टमा उल्लेख छ।

मद्दत खोज्नेहरूलाई ‘चिन्ता कम गर्न नुहाउँदा सुन्तला खानुहोस्’ भन्ने जस्ता शंकास्पद सल्लाहको सामना गर्नुपरेको उल्लेख गरिएको छ।

टिकटकमा देखा पर्ने यस्तो जानकारी बेकार, हानिकारकका साथै कहिलेकाहीं मानसिक स्वास्थ्यको लागि खतरनाक सल्लाहले भरिएको “विनाशकारी” र “विचलित पार्ने” किसिमको हुने विज्ञहरू बताउँछन्।

उनीहरूले मानिसहरु माझ गलत जानकारी फैलिनबाट जोगाउन नियमहरू बलियो बनाउन सरकारलाई आह्वान गरेको टेलिग्राफले रिपोर्ट गरेको छ।

द गार्जियनले ह्यासट्याग मेन्टलहेल्थटिप्स (#mentalhealthtips) सहित टिकटक अन्तर्गत पोस्ट गरिएका १०० सबैभन्दा धेरै हेरिएका भिडियोहरू मनोवैज्ञानिक, मनोचिकित्सक र शैक्षिक विज्ञहरूसँग साझा गरेको र जसले पोस्टहरूमा गलत जानकारी छ कि छैन भनेर मूल्याङ्कन गरेको उल्लेख गरिएको छ।

ट्रमा, न्यूरोडाइभर्जेन्स, एनजाइटी, डिप्रेसन र गम्भीर मानसिक रोगसँग सामना गर्ने बारे सल्लाह प्रदान गर्ने १०० मध्ये ५२ भिडियोहरूमा केही गलत जानकारी भएको र अरू धेरै अस्पष्ट वा असहयोगी तवरको पाइएको विज्ञहरूले पत्ता लगाए थिए।

धेरै भिडियोहरूले नजिकको व्यक्तिगत अनुभव र एनेकडोटल इभिडियन्समा आधारित सामान्य सल्लाह प्रदान गरेको बताइएको छ, जुन “विश्वव्यापी रूपमा लागू नहुन सक्ने” टेलीग्राफले रिपोर्ट गरेको छ।