भारतमा इन्टरनेट सेवाको शुरुवाती मूल्य ‘प्रतिस्पर्धात्मक’ राख्ने स्टारलिंकको योजना

काठमाडौं ।

भारतमा स्टारलिंक इन्टरनेट सेवाको सुरुवातको प्रतीक्षा केही महिनादेखि भइरहेको छ, र अब यो सेवा केही समयमै सेवा सुरु हुने अपेक्षा गर्न सकिन्छ। यसै साता आएको नयाँ रिपोर्टअनुसार ईलन मस्कको स्वामित्वमा रहेको यो कम्पनीले प्रतिस्पर्धात्मक योजना ल्याउने तयारी गरेको छ, जसले उपभोक्ताहरूलाई सेवा लिन प्रलोभन दिनेछ।

रिपोर्टमा उल्लेख भएअनुसार स्टारलिंकले आफ्नो योजनामा असीमित डाटा सुविधा पनि दिन सक्नेछ, जुन प्रायः उपग्रह इन्टरनेट सेवामा सजिलोसँग पाइँदैन।

इकोनोमिक टाइम्सको रिपोर्टले स्टारलिंकले भारतको दूरसञ्चार विभागबाट स्वीकृति प्राप्त गरिसकेको दावी गरेको छ। अब नियामक निकायले उपभोक्ताहरूलाई सहजै उपयोग गर्न सक्ने इन्टरनेट योजना प्रस्तुत गर्न आग्रह गरेको छ।

न्युज१८ का अनुसार स्टारलिंकले भारतमा सेवा सुरु गर्ने योजनाको सुरुवात मूल्य लगभग १० अमेरिकी डलर (करिब ८५० रुपैयाँ) मासिक हुने सम्भावना रहेको रिपोर्टमा उल्लेख छ। कम्पनीले सेवा परिचय गराउने क्रममा विशेष अफरहरू ल्याउन सक्छ, जसले उपभोक्तालाई सेवा जोडिन आकर्षित गर्न सक्छ। यद्यपि, सेवासँगै प्रयोगकर्ताले स्टारलिंक उपकरण खरिद गर्नुपर्नेछ, जुन सेवाको मूल आधार हुनेछ।

तर यो रिपोर्टले अघिल्लो अर्को दावीलाई खण्डन गरेको छ, जसमा स्टारलिंकको मासिक शुल्क योजना स्थान र सेवाको प्रकारअनुसार ३,००० देखि ७,००० रुपैयाँसम्म हुने उल्लेख थियो। साथै, प्रयोगकर्ताले २०,००० देखि ३५,००० रुपैयाँसम्म पर्ने किट — जसमा स्याटेलाइट डिश र वाइ-फाइ राउटर समावेश हुन्छ — छुट्टै किन्नुपर्ने हुन्छ।

उपग्रह सेवा सञ्चालन खर्चिलो हुने भएकाले यसको मूल्य परम्परागत मोबाइल वा वाइ-फाइ योजनाभन्दा धेरै महँगो हुने गर्छ। उदाहरणका लागि, अमेरिका भित्र स्टारलिंकको रेसिडेन्सियल योजना मासिक ८० डलर पर्छ।

तर भारतजस्ता बजारमा सफल हुनका लागि स्टारलिंकले स्थानीय आवश्यकताअनुसार अनुकूल योजना ल्याउनुपर्नेछ। स्पोटिफाइ, एप्पल र युट्युब प्रिमियमले भारतमा अपनाएको यही रणनीतिलाई हेर्न सकिन्छ।