विद्युत आपूर्ति नहुँदा कर्णाली प्रदेशका केही ठाउँमा नेपाल टेलिकमका सेवा सञ्चालनमा कठिनाई

काठमाडौं ।

विद्युत आपूर्ति नभएका कारण कर्णाली प्रदेशका केही ठाउँमा नेपाल टेलिकमका सेवाहरु सञ्चालन गर्न कठिनाई भइरहेको पाइएको छ।

टेलिकमको कर्णाली प्रदेश प्रादेशिक निर्देशनालयले आज एक सूचना जारी गरी विद्युत आपूर्ति नभएका कारण सेवा सञ्चालनमा कठिनाई भएको जानकारी गराएको हो।

‘कर्णाली प्रदेश अन्तर्गत बिभिन्न जिल्लाहरुमा संचालनमा रहेका नेपाल टेलिकमका सेवाहरु मध्ये २०८२ जेष्ठ ७ देखि केही स्थानका वायरलेस  (टुजी/थ्रीजी/फोरजी ) तथा वायरलाइन (एफटीटीएच लगायत) सेवाहरु सञ्चालन हुन नसकेको सम्बन्धित सबैलाई जानकारी गराइन्छ’, सूचनामा उल्लेख छ।

निर्देशनालयका अनुसार हिजो जेष्ठ ७ गते नेपाल विद्युत प्राधिकरण सुर्खेतले “कोहलपुर चिसापानी क्षेत्रमा चलेको हावाहुरीले कोहलपुर- सुर्खेत ३३ केभि लाईन अवरुद्ध भएको” जानकारी गराएको थियो।

विद्युत आपुर्ति नहुँदा कतिपय स्थानका उपकरणहरु सन्चालनको लागि आवश्यक ब्याट्री/पावर ब्याकअप न्यून हुन गई कम्पनीको केही सेवाहरु अवरुद्ध हुन पुगेका बताइएको छ। कम्पनीले कतिपय सेवा अवरुद्ध भएका स्थानका उपकरणहरु यसअघिनै सन्चालनमा ल्याइसकेको प्रस्ट्याएको छ।

कम्पनीले सञ्चालनमा आउन नसकेका स्थानहरुमा सम्भव भएसम्म पोर्टेबल जेनेरेटरमार्फत सेवा सञ्चालन गर्न हर प्रयास गरेको जनाउँदै सेवाग्राहीहरुमा पर्न गएको असुविधा क्षमा याचनासमेत गरेको छ।

हेडलाइनमा कर्णाली प्रदेश हुनुपर्नेमा अन्यथा भएकोमा सच्याईएको छ -सम्पादक