आईटीका नाममा ३० वर्ष पुरानो क्यूबेसिक पढाइँदैछ, एआईसँग जोडिने पाइथनजस्ता कोर्स कहिले राख्ने?-सांसद खनाल

काठमाडौं ।

राष्ट्रिय स्वतन्त्र पार्टीका सांसद तथा पूर्व शिक्षामन्त्री शिशिर खनालले नेपालको विद्यालय शिक्षामा आईटीका नाममा ३० वर्षअगाडिको पाठ्यक्रम पढाई भइरहेको बताएका छन्।

उनले मंगलबार प्रतिनिधि सभा बैठकमा ‘विनियोजन विधेयकका सिद्धान्त र प्राथमिकतामाथि छलफल’का क्रममा यस्तो बताएका हुन्।

‘आईटीका नाममा ३० वर्ष पुरानो क्यूबेसिक करिकुलममा छ। एआईसँग जोडिने पाइथनजस्तो प्रोग्रामिङ ल्याङ्ग्वेजहरू हाम्रो करिकुलममा कतै छैन। यो करिकुलम सुधारको विषयहरू कसरी सुधार्ने?’, उनले प्रश्न गरे।

उनले शिक्षा र प्रविधिलाई कसरी जोड्ने भन्ने विषय नै नआएको भन्दै हाल मुस्किलले ७ हजार आईटी इन्जिनियरहरू उत्पादन गर्न सकेको उनले प्रस्ट पारे। ‘तर त्यसलाई कसरी बढाउने? कोटा सिस्टमले युनिभर्सिटीमा कोटा राख्दिएको छ। चाहँदा चाहँदै पनि कलेजहरूले पढाउन नसक्ने अवस्था छ। तर फेरि शिक्षामा यो विषय जोडिएको छैन’, उनले गुनासो गरे।

यसबाहेक ऊर्जामा गत वर्ष हाइड्रोजन पावरका कुरा आएकोमा यसपटक सौर्य ऊर्जातिर ढल्किएकोमा असन्तुष्टि जनाउँदै उनले सरकारलाई हाइड्रोजन पावरबाट हामीले के उपलब्धि हासिल गर्‍यौं? आफूले घोषणा गरेको लक्ष्य प्राप्त गर्‍यौँ कि गरेनौँ? र अहिले हामी सौर्य उर्जातर्फ ढल्किनुको कारण के हो? भन्ने प्रश्न गरे।

डिजिटल पूर्वाधारको कुरा पछिल्लो समय एकदम चर्चाको विषय बनेको अवगत गराउँदै सांसद खनालले डिजिटल पूर्वाधारको पनि पूर्वाधार इन्टरनेट भए पनि त्यसलाई आज हाम्रो कर प्रणालीभित्र आईटी, टेक्नोलोजीभित्र पनि नमानिने र हालसम्म पनि इन्टरनेटमा सरकारले ३३ प्रतिशत कर लिने गरेको तितो सत्य प्रस्तुत गरे।

‘पूर्वाधारको पूर्वाधारलाई सबैको पहुँचमा कसरी पुर्‍याउने भन्ने आधारभूत कुरामा हामीले काम नै गरेका छैनौँ। तर अब सरकारी तवरमा नै ब्रान्डिङ र मार्केटिङ, नेपाल पनि आईटी सर्भिसेसको डेस्टिनेसन हो भनेर हालसम्म निजी क्षेत्रले गरे झैं सरकारी तहबाट गर्नुपर्ने के देखिन्छ’, उनले सुझाए।