गत महिना भएको आक्रमणमा साना बिजुली उत्पादकको साइबर सुरक्षाको अवस्थाबारे जाँच गर्दै स्पेन

काठमाडौं ।

स्पेनले साना विद्युत् उत्पादकहरूबाट साइबर सुरक्षासम्बन्धी जानकारी मागिरहेको छ। यसो गर्नुको मुख्य कारण गत महिनाको विद्युत् अवरुद्धको अनुसन्धानमा संलग्न निकायहरू देशको पावर ग्रिड ढाल्नका लागि खराब नियत भएका समूहहरूले साना उत्पादकहरूलाई कमजोर कडीका रूपमा प्रयोग गरे कि भनेर पत्ता लगाउने कोशिस रहेको बुझिएको छ। यसबारे फाइनान्सियल टाइम्सले मंगलबार रिपोर्ट गरेको हो।

रिपोर्ट अनुसार वरिष्ठ सरकारी अधिकारीहरू साना तथा मध्यम स्तरका विद्युत् केन्द्रहरू—विशेषगरी सौर्य र पवन ऊर्जास्थलहरू—को साइबर सुरक्षाको मजबूतीप्रति “चिन्तित” रहेका छन्, भन्दै यस विषयमा जानकार एक व्यक्तिको हवाला दिइएको छ।

यस्तो भएको थियो

गत महिना पोर्चुगल र स्पेनमा ठूलो मात्रामा बिजुली कटौती हुँदा मोबाइल फोन नेटवर्कहरु प्रभावित भएका थिए। म्याड्रिड र बार्सिलोनाका एएफपी समाचार एजेन्सीका रिपोर्टरहरूले मानिसहरूलाई नेटवर्कमा कनेक्सन गर्न आफ्नो स्मार्टफोन माथि उठाएर सडकमा निस्किरहेको देखेको बीबीसीले रिपोर्ट गरेको थियो।

समाचार एजेन्सीका अनुसार धेरै मानिसहरूले अपडेटहरू प्राप्त गर्न आफ्नो फोनको सट्टा रेडियो प्रयोग गरेका थिए। समाचारहरुका अनुसार, ट्राफिक बत्तीहरू बन्द भएका थिए र ठूलो ट्राफिक जाम भएको थियो। रेल सेवाहरु ठप्प भएका र विमान उडानहरूमा ढिलाइ भएको थियो।

यस्तै, पोर्चुगलको लिस्बनमा रकम झिक्ने ठाउँहरुमा मानिसहरु लाइनमा लागेका थिए तर बिजुली अवरुद्ध भएका कारण कार्ड भुक्तानीहरू स्वीकार गरिएका थिएनन्।

रोयटर्सले त्यतिबेला रिपोर्ट गरे अनुसार, अधिकारीहरूले कम्तिमा एक घण्टापछि पनि विद्युत अवरुद्ध हुनुको कारण बताउन सकेका थिएनन्। यसो भए पनि सम्भावित साइबर आक्रमणलाई अस्वीकार गरिएको थिएन र अनुसन्धान अगाडि बढाइएको थियो।