स्याटेलाइट राडार भन्छ-अमेरिकाका प्रमुख २८ सहर बर्सेनि २ देखि १० मिलिमिटर सम्म भासिँदै, ह्युस्टन सबैभन्दा अगाडि

काठमाडौं ।

अमेरिकाका २८ वटै सबैभन्दा बढी जनसंख्या भएका सहरहरू — जसमा न्यूयोर्क, सिकागो, डल्लास र डेन्भर पनि पर्छन् — बर्सेनि २ देखि १० मिलिमिटर (०.०८ देखि ०.४ इन्च) सम्मको दरमा भासिँदै गएको एउटा नयाँ अध्ययनले देखाएको छ।

भर्जिनिया टेकका अनुसन्धानकर्ताहरूको टोलीले स्याटेलाइट-आधारित राडार मापन प्रयोग गरेर अमेरिकाका प्रमुख सहरहरूमा जमिन भासिने दरको हाइ-रजोल्युसन नक्सा तयार पारेका छन्।

अध्ययन गरिएको २८ वटै सहरमा कम्तीमा २० प्रतिशत भूभाग भासिँदै थियो भने २५ सहरमा कम्तीमा ६५ प्रतिशत भूभाग भासिँदै गरेको पाइयो।
टेक्सास राज्यभित्रका सहरहरूमा सबैभन्दा तीव्र दरमा जमिन भासिने समस्या देखिएको छ, जहाँ ह्युस्टन सबैभन्दा अगाडि रहेको छ।

ह्युस्टनमा झन्डै ४० प्रतिशत सहर बर्सेनि ५ मिलिमिटर (०.२ इन्च) भन्दा बढीको दरमा भासिँदै छ भने १२ प्रतिशत भूभाग १० मिलिमिटर (०.४ इन्च) को दरमा भासिँदै छ।

स्पेस डटकमका अनुसार जमिन भासिने घटना विश्वभरका थुप्रै क्षेत्रमा देखिने प्राकृतिक भूगर्भीय प्रक्रियाहरूको परिणाम हुन सक्छ। तर भर्जिनिया टेकको अनुसन्धान अनुसार, अमेरिकामा शहरी भासिने ८० प्रतिशत समस्या मानिसले भूमिगत पानीको अत्यधिक प्रयोगका कारण भएको हो।

शहरहरू विस्तार भइरहँदा यो समस्या अझ गम्भीर बन्दै जाने चिन्ता गरिएको छ।

भासिने समस्या तटीय सहरहरूका लागि त खतरा हो नै, समुद्री सतहको वृद्धिसँग पनि जोडिएको छ। तर यसले भित्री भूभागका सहरहरूमा समेत डुबानको जोखिम बढाउने, अनि असमान रूपमा जमिन भासिँदा भवन र पूर्वाधारहरूमा क्षति पुर्‍याउने खतरा पनि रहन्छ।

“यस किसिमको ढिलै असर देखिने खतराले पूर्वाधारहरू समयसँगै चुपचाप बिग्रन सक्छन्, जुन क्षति गम्भीर वा विनाशकारी भएपछि मात्र प्रस्ट देखिन्छ,” भर्जिनिया टेकको अर्थ अब्जरभेसन एन्ड इनोभेसन ल्याबका एसोसिएट प्रोफेसर मनुचेर शिर्जाईले भनेका छन्।