चिप उत्पादनको काम बाह्य कम्पनीलाई दिइरहेका संस्थाहरुलाई चीनले अमेरिकामाथि लगाएको जवाफी महसुल नलाग्ने

काठमाडौं ।

चिप उत्पादनको काम बाह्य कम्पनीलाई दिइरहेका अमेरिकी चिप निर्माता कम्पनीहरू चीनले अमेरिकी आयातमा लगाएको जवाफी महसुलबाट मुक्त हुने मुख्य चिनियाँ सेमिकन्डक्टर संघले शुक्रबार जानकारी दिएको छ।

चिप आपूर्ति श्रृंखला धेरै देश र विशिष्ट प्रविधिमा आधारित भएकाले चिप आयातमा महसुल कसरी लागू हुन्छ भन्ने विषयमा उद्योगभित्र अन्योल थियो।

“सबै प्रकारका इन्टिग्रेटेड सर्किट (प्याक गरिएको वा नप्याक गरिएको) का लागि, आयातको क्रममा कस्टममा उल्लेख गरिने उत्पादन देश वाफर फेब्रिकेसन प्लान्ट रहेको स्थानलाई मानिन्छ,” राज्य-समर्थित चीन सेमिकन्डक्टर उद्योग संघ (सीएसआईए) ले आफ्नो वीच्याट खातामा ‘आकस्मिक सूचना’ प्रकाशन गर्दै जनाएको छ। यो संस्थाले चीनका ठूला चिप कम्पनीहरूको प्रतिनिधित्व गर्ने रोयटर्सले उल्लेख गरेको छ।

क्वालकम र एएमडी जस्ता अमेरिकी चिप डिजाइनर कम्पनीहरूले ताइवानी चिप निर्माता टीएसएमसीसँग उत्पादन गराउँछन्। यस्ता चिपहरूको उत्पादन मूल देश ताइवान मानिनेछ भन्ने जानकारी चिनियाँ चिप निर्माता समुदायको सूचना प्लेटफर्म (ईईटप) ले दिएको छ।

यसको अर्थ चीनस्थित कम्पनीहरूले यस्ता चिप आयात गर्दा अमेरिकी आयातमा लगाइएको चीनको जवाफी महसुल तिर्नुनपर्ने ईईटपले आफ्नो वीच्याटमा उल्लेख गरेको छ।

“विपरीत रूपमा, इन्टेल, टेक्सास इन्स्ट्रुमेन्ट्स, एडीआई र ओएन सेमिकन्डक्टरजस्ता कम्पनीहरूले अमेरिकी भूमिमा आफ्नै फ्याक्ट्री सञ्चालन गर्छन्, त्यसैले यस्ता चिपहरूलाई अमेरिकी मूल मानिने सम्भावना छ र ८४ प्रतिशत वा सोभन्दा बढी महसुल लाग्न सक्छ,” ईईटपले थप उल्लेख गरेको छ।

शुक्रबार बेइजिङले अमेरिकी आयातमा महसुल १२५ प्रतिशत पुर्‍याएको छ, जुन राष्ट्रपति डोनाल्ड ट्रम्पले चिनियाँ सामानमा महसुल १४५ प्रतिशत पुर्‍याउने निर्णयको जवाफस्वरूप आएको हो। बेइजिङले महसुल बढाउने घोषणा गर्नु अघि नै ईईटपको विश्लेषण सार्वजनिक गरिएको थियो।

सीएसआईएको स्पष्टीकरणपछि अमेरिकी मूलका चिपमा उच्च महसुल लाग्न सक्ने सम्भावनाले शुक्रबार चिनियाँ चिप कम्पनीहरूको सेयर मूल्यमा वृद्धि आएको हो।

“सीएसआईएको सूचना कुन अमेरिकी चिपमा महसुल लाग्छ भन्ने प्रस्ट पार्न मद्दत गर्छ,” प्रविधि अनुसन्धान संस्था ओम्डियाका सेमिकन्डक्टर अनुसन्धान निर्देशक हे हुईले भने, “चीनमै प्याक गरिए पनि अमेरिकामा बनेका केही चिपहरूमा महसुल लाग्ने निश्चितजस्तै देखिन्छ।”

उनका अनुसार यसले चिनियाँ चिप उद्योग र आपूर्ति श्रृंखलालाई फाइदा पुर्‍याउन सक्छ, किनभने विदेशी सेमिकन्डक्टर कम्पनीहरू ‘चाइना फर चाइना’ रणनीति अपनाउने सम्भावना छ — अर्थात् चिनियाँ बजारका लागि चिप चीनमै उत्पादन गर्ने रणनीति रहेको छ।