टिकटक बिक्रीको सम्झौता चीनको कानून अनुरुप हुनुपर्छ: चीन

काठमाडौं ।

चीनले बुधबार टिकटकसम्बन्धी कुनै पनि सम्झौता चिनियाँ कानुनअनुसार हुनुपर्ने बताएको छ। अमेरिकी राष्ट्रपति डोनाल्ड ट्रम्पले टिकटक बिक्रीको समयसीमा ७५ दिनले थप गरेपछि चीनले यसअघि लिएको अडानलाई दोहोर्‍याएको हो।

गत हप्ता ट्रम्पले टिकटकको अमेरिकी सम्पत्ति छुट्याउने सम्झौता रोकिएको भन्दै समयसीमा थप गरेका थिए।

समयसीमा थपिएकोबारे सोधिएको प्रश्नमा चीनको वाणिज्य मन्त्रालयका प्रवक्ताले आफ्नो वेबसाइटमा प्रकाशित वक्तव्यमा भनेका छन्, “चीन बजार अर्थतन्त्रका कानुनको बेवास्ता गर्ने, बलपूर्वक लुटपाट गर्ने, र व्यवसायिक संस्थाहरूको वैध अधिकार र हितमा क्षति पुर्‍याउने कार्यको विरोध गर्छ।”
“व्यापारसँग सम्बन्धित विशेष व्यवस्था चिनियाँ कानुन अनुसार हुनुपर्छ, जसमा प्रविधि निर्यात पनि पर्छ। प्रविधि निर्यातका लागि चिनियाँ सरकारको स्वीकृति आवश्यक हुन्छ।”

रोयटर्सका अनुसार टिकटकको सञ्चालनका लागि प्रयोग हुने एल्गोरिदम बाइटडान्सको सम्पूर्ण कारोबारका लागि महत्वपूर्ण मानिन्छ, तर यस एल्गोरिदमको निर्यात चीन सरकारले सन् २०२० मा ल्याएको कानुनअनुसार अनुमतिबिना गर्न पाइँदैन।