राष्ट्रसङ्घसँग प्रविधि र दिगो पर्यटनमा सहयोग गर्न आग्रह

काठमाडौं ।

नेपालले संयुक्त राष्ट्रसङ्घसँग प्रविधि र दिगो पर्यटनमा सहयोगका लागि आग्रह गरेको छ। नेपालका पर्यटकीय गन्तव्यको प्रवर्द्धन कार्यक्रमअन्तर्गत युरोप यात्रामा रहेको नेपाल पर्यटन बोर्डको टोलीले स्पेनको मड्रिडमा संयुक्त राष्ट्रसङ्घीय पर्यटन अधिकारीहरुसँगको छलफलमा दिगो पर्यटनका लागि सहयोगको आग्रह गरिएको हो।

संस्कृति, पर्यटन तथा नागरिक उड्डयन मन्त्रालयका सचिव विनोद प्रकाश सिंहको नेतृत्वमा उच्चस्तरीय नेपाली प्रतिनिधि मण्डलले संयुक्त राष्ट्रसङ्घ पर्यटन मुख्यालयमा भएको छलफलमा विगतमा गरेको सहयोगप्रति आभार व्यक्त गर्दै, प्रविधि, डिजिटल इनोभेसन र दिगो पर्यटन विकासका क्षेत्रमा थप सहकार्यका लागि आग्रह गरेको हो ।

सचिव सिंहले भने, “नेपाल पर्यटन रणनीतिक योजना २०१६-२०२५) र आइटिबी बर्लिन मन्त्रिस्तरीय बैठक, २०२५ मा नेपालको सहभागितालाई स्मरण गर्दै नेपालमा आर्टिफिसियल इन्टेलिजेन्स, डिजिटल इनोभेसन र दिगो पर्यटन विकासका क्षेत्रमा थप सहकार्यको आवश्यकता छ। यसका लागि हामी युएन टुरिजमलाई सहयोगका लागि आग्रह गर्दछौं ।”

द्विपक्षीय प्रतिनिधिमण्डलको बैठकमा राष्ट्रसङ्घ पर्यटनका एसिया–प्रशान्त क्षेत्रीय विभाग निर्देशक ह्यारी हुआङले नेपाली प्रतिनिधिमण्डलको पहिलो पटक संयुक्त राष्ट्रसङ्घ पर्यटनको मुख्यालय भ्रमणलाई ऐतिहासिक क्षणको रूपमा उल्लेख गर्दै नेपाललाई पर्यटन विकासका लागि निरन्तर सहयोग गर्ने प्रतिबद्धता व्यक्त गरे।

उनले नेपाललाई राष्ट्रसङ्घीय पर्यटन कार्यक्रममा सक्रिय रूपमा सहभागी हुन, प्राथमिकताहरू उल्लेख गर्दै औपचारिक प्रस्ताव पेस गरेमा थप सहयोग गर्न तयार रहेको उल्लेख गरे।

पर्यटन विभागका महानिर्देशक डा नारायणप्रसाद रेग्मीले नेपाल–संयुक्त राष्ट्रसङ्घीय पर्यटनसँगको सम्बन्धलाई थप सशक्त बनाउन नेपाल अब राष्ट्रसङ्घ पर्यटनसँग अझ घनिष्ठ सहकार्य गर्ने प्रतिवद्धता व्यक्त गरे। उनले नेपालको पर्यटन नीति सुधार, समावेशी पर्यटन प्रवर्द्धन र पर्यटन लाभको समान वितरणका लागि राष्ट्रसङ्घ पर्यटनको सहयोग आवश्यक रहेको बताए। रासस