टिकटक शप अब फ्रान्स, जर्मनी र इटालीमा पनि उपलब्ध हुने

काठमाडौं ।

इ-कमर्स प्लेटफर्म टिकटक शपले सोमबारदेखि फ्रान्स, जर्मनी र इटालीका प्रयोगकर्ताहरूका लागि सेवा सुरू गर्ने घोषणा गरेको छ। यस विस्तारसँगै यो युरोपमा अझ बढी बजारमा प्रवेश गर्दैछ, जबकि अमेरिकी बजारमा यसको भविष्य अन्योलपूर्ण छ।

यदि चिनियाँ मालिक बाइटडान्सले अमेरिकी खरिदकर्ता भेट्टाउन नसकेमा भने टिकटक अमेरिकामा बन्द हुन सक्ने सम्भावना छ।

टिकटक शप सन् २०२१ देखि बेलायतमा उपलब्ध छ। यसले सन् २०२३ को सेप्टेम्बरमा अमेरिकामा पनि सेवा सुरू गरेको थियो र गत वर्षको चाडपर्वको सिजनमा राम्रो बिक्री हासिल गर्‍यो। तर बाइटडान्सले अमेरिकी कम्पनीलाई टिकटक बिक्री नगरेमा, अमेरिकामा यसको निरन्तरता अनिश्चित रहेको रोयटर्सले उल्लेख गरेको छ।

टिकटक शपले युरोपका थप व्यापारीहरूलाई आफ्नो प्लेटफर्ममा ल्याउने प्रयास गरिरहेको छ, जहाँ धेरै बिक्रेताहरू चीनबाट सिधै उत्पादनहरू बिक्री गर्छन्।

“फ्रान्स, जर्मनी, र इटालीमा हामी पहिले नै व्यापारीहरूसँग सहकार्य गरिरहेका छौँ। उनीहरूका उत्पादनहरू प्लेटफर्ममा सूचीबद्ध गरिँदैछन्, र आउँदो सोमबारदेखि टिकटक शपहाम्रो प्रयोगकर्ताहरूका लागि उपलब्ध हुनेछ,” टिकटक शप यूकेका प्रमुख जन विल्कले रोयटर्सलाई भने।

“युरोपमा हामी बेलायतभन्दा छिटो सेवा विस्तार गर्ने अपेक्षा गर्छौं। चार वर्षअघि बेलायतमा यो मोडल नयाँ भएकाले प्रयोगकर्ताहरूलाई बुझाउन समय लागेको थियो, धेरै प्रयोगहरू गर्नुपरेको थियो,” उनले थपे।

रोयटर्सका अनुसार फ्रान्समा सुपरमार्केट चेन क्यारेफोर, जर्मनीमा फेसन ब्रान्ड अबाउटयू र कस्मेटिक्स कम्पनी कस्नोभा टिकटक शपमा बिक्रेता रूपमा सहभागी हुनेछन्।

टिकटक शपलाई मुख्य रूपमा प्रत्यक्ष प्रसारण (लाइभ स्ट्रिमिङ) मार्फत जुत्ता, मेकअप लगायतका उत्पादनहरू बिक्री गर्ने प्लेटफर्मका रूपमा चिनिन्छ, जहाँ बिक्रेताहरूले बिक्रीमा कमिशन पाउँछन्।

तर, विल्कका अनुसार प्लेटफर्मले उत्पादन र मूल्य दायरा फराकिलो बनाउन खोजिरहेको छ। उनले बेलायतमा टिकटक शपमा एक लक्जरी स्टोरले दोस्रो-हात बिर्किन ब्यागहरू बिक्री गरिरहेको उदाहरण दिएका छन्।