दूरसञ्चार प्राधिकरण वार्षिकोत्सव कार्यक्रममै नेतृत्वको क्षमता माथि कर्मचारी युनियनको प्रश्न

काठमाडौं ।

नेपाल दूरसञ्चार प्राधिकरणले २७ औं वार्षिकोत्सव मनाईरहँदा कर्मचारी युनियनहरुले भने नेतृत्व क्षमतामाथि नै प्रश्न उठाएका छन्। युनियनले यसअघि प्राधिकरण अध्यक्ष बोर्ड र व्यवस्थापनको क्षमता प्रति आशंका गर्दै आएकोमा अहिले भने औपचारिक कार्यक्रममै विरोध जनाएको हो।

नेपाल दूरसञ्चार प्राधिकरण ट्रेड यूनियनका सचिव राजु रिजालले प्राधिकरण नेतृत्व कमजोर रहेको गुनासो गरेका हुन्। उनले प्राधिकरणलाई स्पष्टता सहितको सहकार्यमूलक र आत्मविश्वासी नेतृत्व क्षमताको आवश्यकता रहेको बताएका थिए।

प्राधिकरणको २७ औं वार्षिकोत्सवका अवसरमा बोल्दै सचिव रिजालले आईएलओको मापदण्ड बमोजिम न्यूनतम हुनुपर्ने काम गर्ने वातावरण र अक्युपेशनल सेफ्टी एण्ड हेल्थ (पेशागत सुरक्षा तथा स्वास्थ्य)को प्रत्याभूति नहुनाले कर्मचारीहरूमा उत्प्रेरणाको कमी रहेको बताएका थिए।

प्राधिकरणबाट सञ्चालनमा ल्याइएका आयोजना तथा कार्यक्रमहरू अलपत्र र न्यून गुणस्तरीय रहेको तर्फ औंल्याउँदै प्रश्न गरे, “प्राधिकरणको निर्णय क्षमता कमजोर हुँदा स-साना निर्णयमा समेत मन्त्रालय गुहार्नु पर्ने अवस्थाले दूरसञ्चार ऐनले परिकल्पना गरेको कार्यात्मक स्वायत्तताको सम्बन्धमा हामी आफ्नै निर्णय क्षमताको कारणले दूरसञ्चार क्षेत्र संकट उन्मुख भएको हो कि?”

यसबाहेक उनले कर्मचारी विनियमावली, २०७६ मा समसामयिक संशोधनको बुंदा समेटेर मन्त्रालयमा सहमतिको लागि पठाउने चरणमा रहेकोले विनियमावली सहमतिको विषयलाई सकारात्मक रूपमा लिई सहजीकरणका लागि मन्त्री गुरुङसमक्ष अनुरोध गरेका थिए।