काठमाडौं ।
चीनले कडा अमेरिकी निर्यात नियन्त्रणका बाबजुद उन्नत एनभिडिया चिपहरू प्राप्त गरिरहेको विषयमा कडा निगरानी भइरहेको छ। चिनियाँ व्यापारीहरूले एनभिडियाको शक्तिशाली ब्ल्याकवेल जीपीयू अर्डर गरिरहेको रिपोर्टहरू आएका छन्।
बिहीबार सिङ्गापुर प्रहरीले एनभिडिया चिप तस्करीको आरोपमा तीन जनालाई पक्राऊ गरेको छ, जसमा दुई जना सिङ्गापुरका र एक जना चिनियाँ नागरिक छन्। उनीहरूलाई सर्भर आपूर्तिसँग सम्बन्धित ठगीको आरोप लागेको च्यानल न्युज एसियाले जनाएको छ।
ब्लूमबर्गका अनुसार, सिङ्गापुरले पक्राउ परेका व्यक्तिहरूले डेल र सुपरमाइक्रोले निर्माण गरेका सर्भरहरूमा प्रतिबन्धित एनभिडिया चिप समावेश थियो वा थिएन भन्ने अनुसन्धान गरिरहेको छ। ती सर्भरहरू मलेसिया पठाइनुपर्ने भए पनि अन्यत्र पठाइएको आशंका गरिएको छ।
एनभिडियाको वार्षिक प्रतिवेदनअनुसार कम्पनीले सिङ्गापुरलाई बिक्री गर्ने गरेको छ। २०२५ आर्थिक वर्षमा सिङ्गापुरले एनभिडियाको कुल आम्दानीको १८ प्रतिशत प्रतिनिधित्व गरे पनि वास्तविक आपूर्ति भने २ प्रतिशत भन्दा कम थियो।
डेलले टेकक्रञ्चलाई दिएको जानकारीअनुसार, कम्पनीसँग कडा व्यापार नियम अनुपालन कार्यक्रम छ, र नियम उल्लङ्घन गर्ने ग्राहकहरूको अनुसन्धान गरिन्छ। एनभिडियाले यसबारे टिप्पणी गर्न अस्वीकार गर्यो भने सुपरमाइक्रोले तत्काल प्रतिक्रिया दिएको छैन।
प्रकाशित: २० फाल्गुन २०८१, मंगलवार
