नयाँ उद्देश्यका साथ मेटाले ह्युमनोइड रोबोटको विकासमा लगानी गर्ने

काठमाडौं ।

मेटाले ह्युमनोइड रोबोट्सको क्षेत्रमा नयाँ लगानीमा ध्यान केन्द्रित गर्ने घोषणा गरेको छ।

अमेरिकी कम्पनीले एललामा एआई प्लेटफर्मको क्षमतालाई अधिकतम बनाउने मुख्य लक्ष्यका साथ ह्युमनोइड रोबोटहरूसँग डिल (व्यवहार) गर्ने नयाँ अनुसन्धान र विकास टोली स्थापना गर्ने घोषणा गरेको कम्पनीका प्रमुख प्रविधि अधिकारी एन्ड्रयू बोसवर्थले घोषणा गरेका छन्।

यो कदमले आर्टिफिसियल इन्टेलिजेन्समा मेटाको लगानीको रणनीतिक विस्तारलाई चिन्ह लगाउँछ भनि रोयटर्सले उल्लेख गरेको छ।

अटोनोमस भेहिकल (स्वायत्त सवारी साधनहरू) का विशेषज्ञ र क्रुजका पूर्व सीईओ मार्क विटेनलाई रोबोटिक्स डिभिजनको प्रमुख नियुक्त गरिएको छ भने जोन कोरीललाई रिटेलको उपाध्यक्ष नियुक्त गरिएको उल्लेख छ।

एस्सिलोरलक्सोटिकासँगको सहकार्यमा विकसित रे–ब्यान मेटा स्मार्ट ग्लासेस र क्वेस्ट डिभाइसहरू लगायत उपभोक्ता उत्पादनहरूको मेटाको बिक्रीलाई सुदृढ पार्ने उनको कार्य हुनेछ।

ठूला प्राविधिक कम्पनीहरू र स्टार्टअपहरूले उद्योग, लजिस्टिक र घरायसी कार्यहरूका लागि आर्टिफिसियल इन्टेलिजेन्स–सञ्चालित रोबोटहरू विकास गर्न अरबौं लगानी गरिरहेका समयमा यो विकास निर्देशन आएको बताइएको छ।

एआई प्रणालीहरूसँग भौतिक संसारको सीमित बुझाइ भएको हुनाले यस क्षेत्रतर्फको प्रगति भाषा मोडेलहरूको विकास भन्दा सुस्त भएको उल्लेख गरिएको छ।

थ्री डायमेन्सनल स्पेस (तीन–आयामी ठाउँ) मा बुझ्न, सुन्न र सर्न सक्ने इन्टेलिजेन्ट एसिस्टेन्ट (बौद्धिक सहायकहरू) सिर्जना गर्ने उद्देश्यका साथ मेटाले तथाकथित “ह्युमनोइड आर्टिफिसियल इन्टेलिजेन्स” मा लगानी गरेको छ।

कम्पनीले युनिट्री रोबोटिक्स र फिगर एआई जस्ता फर्महरूसँग रोबोटिक डिभाइसहरू विकास गर्न सम्भावित सहयोगको बारेमा कुराकानी सुरु गरिसकेको बताइएको छ। हालका लागि यसको आफ्नै मेटा–ब्रान्डेड रोबोट लन्च गर्ने कुनै योजना भने नभएको उल्लेख गरिएको छ।

मेटाको आर्टिफिसियल इन्टेलिजेन्स र भर्चुअल रियालिटी प्रोजेक्टहरूको लागि जिम्मेवार डिभिजन रियलिटी ल्याब्सले गत त्रैमासिकमा ५ बिलियन अमेरिकी डलर घाटा व्यहोरेको पोष्ट गरेको भए पनि, ह्युमनोइड रोबोटमा लगानी गर्दा अन्ततः कम्पनीको वृद्धि हुने कम्पनीले विश्वास व्यक्त गरेको उल्लेख छ।

मेटासँगै, एप्पल र गुगल जस्ता अन्य टेक्नोलोजी कम्पनीहरू पनि ह्युमनोइड रोबोटिक्सको क्षेत्रमा प्रवेश गरिरहेका छन्। त्यसैले उनीहरू (कम्पनीहरू)ले यी लगानीहरू दीर्घकालीन रूपमा सफल हुने आशा गरेको टेलीग्राफले उल्लेख गरेको छ।