परिमार्जनसहित सामाजिक सञ्जालसम्बन्धी विधेयक पारित हुन्छः सञ्चारमन्त्री गुरुङ

काठमाडौं ।

सञ्चार तथा सूचना प्रविधिमन्त्री पृथ्वीसुब्बा गुरुङले परिमार्जनसहित सामाजिक सञ्जालसम्बन्धी विधेयक पारित हुने बताएका छन्।

आज जिरी भ्रमण वर्ष–२०२५ को उद्घाटन कार्यक्रममा मन्त्री गुरुङले सामाजिक सञ्जालहरूमा देखिएको विकृति अन्त्यका लागि अध्यादेशमार्फत सामाजिक सञ्जालसम्बन्धी विधेयक ल्याइएको उल्लेख गर्दै यसले क्रियाशील पत्रकारहरूलाई समस्या नहुने बताए। उनले उक्त विधेयकबाट वास्तविक पत्रकारहरू डराउनुपर्ने अवस्था नरहेको उल्लेख गरे।

सरकारका प्रवक्तासमेत रहेका मन्त्री गुरुङले सामाजिक सञ्जालसम्बन्धी विधेयकको विषयमा धेरै सुझावहरू आएकाले त्यसको आधारमा परिर्माजनसहित पारित हुने विश्वास व्यक्त गरे। “विधेयकका बारेमा धेरै बहस र छलफल गरी सुझाव लिएका छौँ”, उनले भने, “त्यसैले यो जस्ताको तस्तै पास हुँदैन, सुझावका आधारमा परिर्माजनसहित पास गर्छौं।”

सामाजिक सञ्जालहरूमा देखिएका विकृति अन्त्यका लागि विधेयक आवश्यक रहेको मन्त्री गुरुङको भनाइ छ। मुलुकको आर्थिक विकासका लागि उद्योग, व्यापार, कल–कारखाना सरकारले सञ्चालन गर्ने नभई निजी क्षेत्रले सञ्चालन गर्नुपर्ने धारणा राख्दै उनले त्यसमा सरकारले नीतिगत तहबाट सहयोग गर्ने जानकारी दिए।