स्पेसएक्सको फाल्कन ९ रकेटमार्फत् स्पेनको नेक्स्ट जेनेरेशन कम्युनिकेशन स्याटेलाइट प्रक्षेपण

काठमाडौं ।

स्पेसएक्स ले बुधबार राति (जनवरी २९) SpainSat NG-1 नामक नयाँ पुस्ताको स्पेनिस सञ्चार उपग्रहलाई कक्षमा सफलतापूर्वक प्रक्षेपण गरेको छ।

स्पेनस्याट नेक्स्ट जेनेरेशन १ (SpainSat NG-1) नामक यूरोपियन स्पेस एजेन्सी (ईएसए) र हाइडस्याट कम्युनिकेशनका लागि सञ्चार उपग्रह बोकिरहेको फाल्कन ९ रकेट फ्लोरिडाको नासाको केनेडी स्पेस सेन्टरको प्याड ३०ए बाट पूर्वीय समयअनुसार राति ८:३४ बजे (जनवरी ३० मा ०१:३४ जीएमटी) उडान भरेको हो।

स्पेस डटकमका अनुसार यो प्रक्षेपण स्पेसएक्स का लागि सन् २०२५ को १३औँ सफल प्रक्षेपण हो र फाल्कन ९ को पहिलो चरणको बुस्टर बी१०७३ को अन्तिम उडानको रूपमा चिनिएको छ।

बी१०७३ बुस्टरको यो २१औँ र अन्तिम उडान थियो। यसले यसअघि जापानी चन्द्र ल्यान्डर (HAKUTO M1) र अन्तर्राष्ट्रिय अन्तरिक्ष स्टेशनमा पुनःआपूर्ति (CRS-27) मिसनलगायत अन्य धेरै उडानहरू सम्पन्न गरिसकेको छ। तर SpainSat NG-1 मिसनको प्रदर्शन आवश्यकताका कारण यो चरण भने पुनः प्राप्त नगरिएको स्पेसएक्सले मिशन अवलोकनमा उल्लेख गरेको छ।

“स्पेनस्याट एनजीले युरोपमा सुरक्षित उपग्रह सञ्चारको नयाँ पुस्ता प्रतिनिधित्व गर्दछ। यो प्रक्षेपणले सरकारी प्रयोगकर्ताहरूलाई युरोप र त्यसभन्दा बाहिर थप अनुकूल र सुरक्षित सञ्चार सेवाहरू प्रदान गर्ने दिशामा महत्त्वपूर्ण उपलब्धि चिह्नित गरेको छ,” ईएसएका कनेक्टिभिटी र सेक्युर कम्युनिकेशन निर्देशक लरेन्ट जफार्टले एक विज्ञप्तिमा भने।

फाल्कन ९ को माथिल्लो चरणले SpainSat NG-1 उपग्रहलाई भूस्थिर अर्थात् जिओस्टेशनरी स्थानान्तरण कक्षमा पुर्‍याएको थियो, जहाँ प्रक्षेपण भएको साढे ३१ मिनेटमा यो उपग्रह अलग गरिएको थियो।

उपग्रह त्यसपछि पृथ्वीबाट २२ हजार २३६ माइल (३५,७८६ किमी) माथि आफ्नो अन्तिम स्थानमा पुग्न आफैँले प्रोपेल गर्ने अर्थात् धकेल्ने बताइएको छ। “SpainSat NG-1 को सफलतापूर्वक छुट्टै प्रक्षेपणसँगै, यसले आफ्नो अन्तिम गन्तव्यतर्फको यात्रा सुरु गरेको छ,” स्पेसएक्स का जोन इनस्प्रकरले प्रक्षेपण कभरको समापनमा भने।