चीनसम्बद्ध ह्याकरहरुले अमेरिकी दूरसञ्चार कम्पनीका निगरानी डाटा चोरेको आरोप

काठमाडौं ।

चीनसँग सम्बन्धित ह्याकरहरूले अमेरिकामा कानूनी निकायहरूलाई लक्षित गरेको निगरानी डाटा चोरी गरेको पाइएको छ जसमा धेरै टेलिकम कम्पनीहरूको नेटवर्कमा प्रवेश गरेर महत्त्वपूर्ण जानकारी लिएका छन्।

अमेरिकाको एफबीआई रसीआईएसए (साइबर सेक्युरिटी एण्ड इन्फ्रास्ट्रक्चर एजेन्सी) ले बुधबार संयुक्त बयान जारी गर्दै यो घटनाबारे जानकारी दिएका हुन्। ह्याकरहरूले विभिन्न टेलिकम्युनिकेशन कम्पनीहरूमा प्रवेश गरी अमेरिकी ग्राहकको कल रेकर्डहरू र सञ्चार डाटा चोरेका छन्।

चोरी गरिएका डेटा प्रायः सरकार वा राजनीतिक गतिविधिमा संलग्न सीमित व्यक्तिहरूको थियो। ह्याकरहरूले अमेरिकी कानूनी निकायहरूले अदालतको आदेश अन्तर्गत माग गरेको केही जानकारीहरू पनि चोरी गरेका थिए।

यो घटना यसअघि वालस्ट्रीट जर्नल लगायतका मिडिया रिपोर्टहरूले दावी गरेको कुरालाई पुष्टि गर्दछ, जहाँ चिनियाँ ह्याकरहरूले अमेरिकी कानूनी निकायहरूको जासुसी प्रणालीमा ‘ब्याक डोर’ खोलेको आशंका गरिएको थियो।

थप रूपमा ह्याकरहरूले पूर्व राष्ट्रपति डोनाल्ड ट्रम्प, उपराष्ट्रपति पदका उम्मेदवार जेडी भान्स र अन्य उच्च राजनीतिक व्यक्तिहरूका फोनहरूलाई पनि निशाना बनाएको रोयटर्सको रिपोर्ट छ।

यसले अमेरिकी टेलिकम्युनिकेशन इन्फ्रास्ट्रक्चरको सुरक्षामाथि ठूलो प्रश्न खडा गरेको छ। यो मुद्दालाई डिपार्टमेन्ट अफ होमल्याण्ड सेक्युरिटीको साइबार सेफ्टी रिभ्यू बोर्डद्वारा अनुसन्धानको लागि राखिएको छ।

यो बोर्डले प्रमुख डिजिटल सुरक्षा घटनाहरूको कारण र प्रभावहरूको विश्लेषण गर्ने उद्देश्यले स्थापना गरिएको हो। सीआईएसएले थप विवरण दिन अस्वीकार गरेको छ भने एफबीआईले पनि तत्काल कुनै प्रतिक्रिया दिएको छैन।

चिनियाँ दूतावासले यस विषयमा कुनै प्रतिक्रिया नदिएको उल्लेख गरिएको छ। बेइजिङले सधैंजसो अमेरिकी ह्याकिङ आरोपहरूको खण्डन गर्दै आएको रोयटर्सले उल्लेख गरेको छ।

यो घटना अमेरिकाको डिजिटल सुरक्षामा गम्भीर चुनौतीका रूपमा आएको छ र यसले विशेष गरी सरकारी र राजनीतिक क्षेत्रको संचार प्रणालीमाथि लक्षित साइबर आक्रमणका घटनाहरूले थप चिन्ता बढाएको छ। यस विषयमा थप अनुसन्धान र सुरक्षात्मक कदमहरू उठाइने अपेक्षा गरिएको छ।