वित्तीय विवरण र रोयल्टी रकम असोज मसान्तसम्म बुझाउन सेवा प्रदायकलाई दूरसञ्चार प्राधिकरणको निर्देशन

काठमाडौं ।

अनुमतिपत्र सेवा प्रदायकहरुलाई २०७९/८० को अडिटेड वित्तीय विवरण र सो विवरण अनुसार बुझाउनुपर्ने कुल आम्दानीको ४ प्रतिशतले हुने रोयल्टी बापतको रकम र २ प्रतिशतले हुने ग्रामीण दूरसञ्चार विकास कोष बापतको रकम २०८१ असोज मसान्तभित्र बुझाउन विभिन्न सेवा प्रदायकहरुलाई नेपाल दूरसञ्चार प्राधिकरणले निर्देशन दिएको छ।

प्राधिकरणले आज एक सूचना प्रकाशन गरी आ.व. २०७९/८० को अडिटेड वित्तीय विवरण र सो विवरण अनुसार बुझाउनुपर्ने रकम मिति २०८० पुस मसान्तभित्र बुझाउन यसअघि नै पत्राचार गरिएकोमा हालसम्म दाखिला नगरेकोले फेरि एक म्याद दिएर बुझाउन निर्देशन दिएको हो।

“यही २०८१ असोज मसान्तभित्र नियमानुसार लाग्ने थप दस्तुर सहित रोयल्टी बापतको रकम सञ्चार तथा सूचना प्रविधि मन्त्रालयको राजस्व खातामा र ग्रामीण दूरसञ्चार विकास कोष (आरटीडीएफ) बापतको रकम प्राधिकरणको खातामा दाखिला गर्न अनुरोध गरिएको छ,” सूचनामा भनिएको छ।

यसबाहेक सञ्चार तथा सूचना प्रविधि मन्त्रालयमा दाखिला गरेको रोयल्टी रकमको भौचर र यस प्राधिकरणको खातामा दाखिला गरेको RTDF रकमको भौचर र अडिटेड वित्तीय विवरण सहित यस प्राधिकरणमा अनिवार्य रूपमा दर्ता गरी जानकारी गराउन समेत सूचना मार्फत अनुरोध गरिएको छ।

वित्तीय विवरण, आरटीडीएफ रकम तथा रोयल्टी नबुझाएको सेवा प्रदायकहरूको विवरण

नियमानुसार आरटीडीएफ रकम तथा रोयल्टी नबुझाएको सेवा प्रदायकहरूको विवरण