कालीकोटका सामुदायिक विद्यालयमा कम्प्युटर शिक्षा पुन: सञ्चालनमा

काठमाडौं ।

कालीकोटका सामुदायिक विद्यालयमा कम्प्युटर शिक्षा पुनः प्रयोगमा ल्याउन थालिएको छ। राष्ट्रिय पाठ्यक्रम प्रारूप–२०७६ ले खारेज गरेको कक्षा ६ र ८ को अनिवार्य कम्प्युटर शिक्षा अहिले पुनः प्रयोगमा ल्याउन थालिएको हो।

अहिले कक्षा ६ देखि १० सम्म अनिवार्य रूपमा विज्ञान तथा प्राविधिक शिक्षाका रूपमा विकास गरेपछि कम्प्युटर शिक्षा प्रयोगमा आउन थालेको हो।

अर्कोतर्फ ऐच्छिक रूपमा कक्षा ९ र १० का लागि कम्प्युटर शिक्षासमेत समावेश गरेकाले सामुदायिक विद्यालयमा कम्प्युटर शिक्षा प्रयोगमा आउन थालेको हो। सुरुमा दक्ष जनशक्तिबिना सुरु गरिएको कम्प्युटर शिक्षा केही वर्ष नाममा मात्र सीमित भयो।

उक्त विषय प्रभावकारी नभएपछि बिचैमा रोकेर विज्ञान विषयसँंग प्रविधि जाडेर पुनः कम्प्युटर शिक्षा प्रयोगमा आउँदा विद्यार्थी उत्साहित भएका छन् ।

नेपाल सरकार शिक्षा मन्त्रालयसँगको समन्वयमा नेपाल दूरसञ्चार प्राधिकरणको सहयोगमा कालीकोट जिल्लाको मोतीराम माध्यमिक विद्यालयमा कम्प्युटर ल्याब स्थापना गरिएको थियो तर दक्षताकै
अभावले अलपत्र परेको थियो।

पछिल्लो समय विद्यालयले कम्प्युटरसम्बन्धी जानकार भएका शिक्षकको
व्यवस्थापन गरे पछि विस्तारै कम्प्युटर ल्याब प्रयोगमा आएको छ। मोतीराम माध्यमिक विद्यालयमा अध्ययनरत छात्रा बबिता चौलागाईंले
कम्प्युटर ल्याब प्रयोगमा आउँदा कम्प्युटर सिक्न सहज भएको बताइन् ।

छात्रा चौलागाईंले कक्षा ९ देखि नै ऐच्छिक विषयका रूपमा कम्प्युटर विषय लिएकी थिइन् तर कम्प्युटरको अभ्यास नभएर यो शिक्षाको पढाइ
समस्याका रूपमा रहेका बेला ल्याब सञ्चालनमा आउँदा निकै खुसी लागेको उनले थपिन्।

मोतीराममा ल्याब सञ्चालनका लागि भनेर नेपाल दूरसञ्चार प्राविधिकरणले ३० वटा कम्प्युटर सहयोग गरेको थियो। २०७४ सालदेखि कम्प्युटर ल्याब सुरु गर्ने उद्देश्यले सुरु गरिएको भए पनि कम्प्युटरसम्बन्धी जानकारी भएका शिक्षक अभावले प्रयोगमा आउन सकेको थिएन।

अहिले बल्ल ती कम्प्युटर प्रयोगमा आउन थालेका छन्। रास्कोटकै कालाशिल्ला माध्यमिक विद्यालयमा पनि चार वटा कम्प्युटर राखेर पालैपालो विद्यार्थीलाई अभ्यास गराउन थालिएको छ।

सुरुमा अभ्यासबिना कम्प्युटर शिक्षा प्रयोगमा ल्याएको भए पनि पछिल्लो समय सामुदायिक विद्यालयमा कम्प्युटर शिक्षाको अभ्यास सुरु हुन थालेपछि विद्यार्थी पनि उत्साहित भएका छन्।

विद्यालयका प्रधानाध्यापक देवराज चौलागाईंले थोरै स्रोतसाधनबाट भए पनि विद्यार्थीको इच्छा पूरा गर्ने र कम्प्युटरसँग जानकार गराउन थालिएको बताए।

जिल्लाका अन्य सरकारी विद्यालयमा पनि यो अभ्यास भइरहेको छ। रास्कोटकै बडीमालिका माध्यमिक विद्यालयमा पनि कम्प्युटर अभ्यास
लामो समयदेखि चलिरहेको छ। अहिले कम्प्युटर शिक्षकको व्यवस्था भएपछि विद्यार्थीलाई पढाउन पनि सहज भएको विद्यालयको भनाइ छ।

सरकारी अनुदान र विभिन्न निकायले सहयोग गरेर विद्यालयलाई प्रदान गरिएका कम्प्युटरको सही प्रयोग गराउन सकेमा राम्रो उपलब्धि देखिने सरकारी निकायको भनाइ छ ।

शिक्षा विकास तथा समन्वय एकाइ कालीकोटका प्रमुख लालप्रसाद पोख्रेलले स्रोतको व्यवस्थान गराएर सबै विद्यालयमा कम्प्युटर अभ्यास गराउनुपर्ने बताए।

आजको गोरखापत्रबाट