टेलिकमको नयाँ बिलिङ सिस्टमको बारेमा परेको रिट खारेज, टेन्डर हाल्ने कम्पनीको प्राविधिक मूल्यांकन हुँदै

काठमाडौं ।

नेपाल टेलिकमको बिलिङ सिस्टमको टेन्डर प्रकृया विरुद्धमा सर्वोच्च अदालतमा दायर मुद्दामा अदालतले नेपाल टेलिकमलाई प्रकृया अगाडि बढाउने बाटो खोली दिएकोछ।

सर्वोच्च अदालतको मंगलबार बसेको न्यायाधिकद्वय नहकुल सुवेदी र महेश शर्मा पौडेलको संयुक्त इजलासले उक्त विषयमा परेको रिट खारेज गरिदिएको हो।

टेलिकम बिलिङको ठेक्कामा अमेरिकी कम्पनी सीएसजीको मात्रै आवेदन परेको केही दिनपछि सर्वोच्चमा रिट परेको थियो। रिटमा ठेक्का रोकी पाउन माग गरिएको थियो।

अधिवक्ता रिता कार्कीले नेपाल टेलिकम, नेपाल दूरसंचार प्राधिकरण र संचार तथा सूचना प्रविधि मन्त्रालयलाई विपक्षी बनाउँदै मुद्दा दायर गरेकी थिईन्।

उक्त मुद्दामा तत्कालिन समयमा डलरको मुल्य र अहिलेको अवस्थामा डलरको मुल्य निकै फरक परेको र त्यसले टेलिकमको खर्च लागत बढाउने उल्लेख गरिएको थियो।

सर्वोच्चमा जेठ २० गते दायर गरिएको रिटमा पटक पटक सुनुवाई हुँदै मंगलबार रिट खारेजीमा परेको हो। रिट खारेजीसँगै अदालतले टेन्डर प्रकृया बारेमा निर्देशनात्मक आदेश जारी गरेको छ।

टेलिकम स्रोतकाअनुसार उक्त टेन्डरको पुरानो कागजातमा डलरको मूल्य चार वर्षअघिको दर अर्थात ११७ रुपैयाँ तोकिएको छ। तर अहिलेको विनियम दरअनुसार डलरको भाउ १३४ रुपैयाँ हाराहारी रहेको छ।

नेपाल टेलिकमको बिलिङ सिस्टममा एक दशकभन्दा एकछत्र राज गरिरहेको एसिया इन्फो नयाँ ठेक्का प्रक्रियामा असन्तुष्ट छ। नयाँ ठेक्का प्रकृयामा उक्त कम्पनी सहभागी हुन नसक्ने भएपछि नयाँ बिलिङ रोक्न खोज्दै आएको छ।

अझ कम्पनीको पुरानै सिस्टमलाई अपग्रेड गर्ने नाममा फोर प्लस वान अर्थात करिब ५ वर्ष संचालन गर्न अर्बौंको खेल भएको जानकारी बाहिरिएपछि उक्त विषय अख्तियारको छानबिनमा रहेको छ।

उक्त सिस्टम धेरै पुरानो र अहिले टेलिकमको बजार तथा सेवासँग मेल नखाने भएपछि टेलिकमले नयाँ ठेक्का खोलेको थियो। पुरानो बिलिङ्गका कारण राजस्वमा ११ प्रतिशतसम्म चुहावट हुने गरेको टेलिकमको भनाई छ।

पुरानो बिलिङ हटेसँगै एसिया इन्फोलाई वार्षिक प्राप्त हुने करिब ६० करोड रुपैयाँ आम्दानी गुमाउने संभावना छ।

हाल रिट खारेज भएसँगै नेपाल टेलिकमलाई बिलिङ्गको टेन्डर अगाडि बढाउन सहज हुने देखिन्छ। उक्त टेन्डर प्रकृयामा हाल एक मात्र अमेरिकी कम्पनी सीएसजी इन्टरप्राइजेजको आवेदन परेको छ।

यस बिचमा अन्तिम दिन चिनियाँ टेलिकम जायन्ट ह्वावेले समेत आवेदन दिन खोजेको थियो। तर कम्पनीले उक्त दिन प्राविधिक कारणले निवेदन अनलाइनमा अपलोड गर्न नसकेको भन्दै टेलिकम र सार्वजनिक खरिद तथा अनुगमन कार्यालयमा उजुरीसमेत गरेको थियो।

रिट खारेजीसँगै, टेलिकमले अब सीएसजीको प्रस्तावको प्राविधिक र आर्थिक विवरणको विश्लेषण गरेर प्रक्रिया अघि बढाउने बाटो खुलेको छ।

टेलिकम स्रोतकाअनुसार हाल उक्त कम्पनीको प्राविधिक प्रस्तावको मूल्यांकन चरणमा रहेको छ। र सो मूल्यांकनमा कम्पनी नेपाल टेलिकमको टेन्डरका लागि प्राविधिकरुपमा योग्य भए नभएको हेरिनेछ।

प्राविधिक मूल्यांकनमा पास भएपछि कम्पनीको आर्थिक प्रस्ताव मुल्यांकनमा जाने टेलिकमले जनाएको छ।