ब्राजिलमा एक्स पूर्ण रुपमा प्रतिबन्धित हुने भएपछि स्टारलिंकको स्थानीय बैंक खाता फ्रिज

काठमाडौं ।

ब्राजिलका एक न्यायाधीशले त्यहाँ रहेका स्टारलिंकका बैंक खाताहरू रोक्का गरेका छन्। यो कदम ब्राजिलमा एक्स (ट्विटर) बन्द गर्ने धम्की दिने सर्वोच्च अदालतका त्यही न्यायाधीशको प्रतिक्रिया स्वरूप आएको हो बताइएको छ।

रोयटर्सका अनुसार यो निर्णय सामाजिक सञ्जाल कम्पनीसँग चलिरहेको कानुनी लडाइँको प्रत्यक्ष प्रतिक्रिया भएको जनाइएको छ।

एक्सका मालिक एलन मस्कको ब्राजिलको सर्वोच्च अदालतका न्यायाधीश अलेक्सान्ड्रे डे मोराएससँग महिनौँदेखि केही खाताहरू ब्लक गर्ने मागलाई लिएर विवाद चलिरहेको छ।

कम्पनीले यस महिनाको सुरुमा अदालतको आदेशको कारण आफ्नो ब्राजिलको सेवा बन्द गरेको थियो जसलाई एक्सले “सेन्सरशिप आदेश” को रूपमा व्याख्या गरेको छ।

अब मोराएस स्पेसएक्स अन्तर्गतको मस्कको अर्को कम्पनी स्टारलिंकलाई प्रयोग गर्दै एक्सलाई अदालतको आदेश पालना गर्न बाध्य बनाउने प्रयास गरिरहेका समाचार संस्था इन्ग्याजेटले जनाएको छ।

‘एक्समाथि लगाइएको जरिबाना स्टारलिंकलाई तिराउने आदेश असंवैधानिक र गलत निर्णयमा आधारित छ’, स्टारलिंकले एक्समा एउटा वक्तव्यमा लेखेको छ।

‘यो गोप्य रूपमा जारी र संविधानले प्रत्याभूत गरेको कुनै पनि कानुनी प्रक्रिया बिना स्टारलिंकलाई जारी गरिएको थियो। हामी यो मामिलालाई कानुनी रूपमा सम्बोधन गर्ने योजना बनाउँछौं’, उनले थपे।

मोराएसले देशमा एक्सलाई पूरै बन्द गर्ने धम्की पनि दिएका छन्। बुधबार, न्यायाधीशले यदि एक्सले देशमा कानूनी प्रतिनिधि नियुक्त नगरेमा ब्राजिलमा यसलाई बन्द गरिनेछ चेतावनी दिए।

सो समयसीमा सकिएको केही समयपछि बिहीबार एक्सले एउटा अपडेटमा उसलाई “छिट्टै” मोराएसले बन्द गर्न आदेश दिने अपेक्षा रहेको उल्लेख गरेको थियो।

“हामी कतै पनि यो आग्रह गरिरहेका छैनौं कि अन्य देशहरूको पनि संयुक्त राज्य अमेरिकासँग समान स्वतन्त्र अभिव्यक्ति कानूनहरू हुनुपर्छ,” कम्पनीले अंग्रेजी र पोर्तुगीजमा प्रकाशित गरेको एक वक्तव्यमा लेखेको छ।

“यहाँको मुख्य मुद्दा यो हो कि न्यायाधीश डे मोराएसले हामीलाई ब्राजिलको आफ्नै कानून उल्लङ्घन गर्न माग गरिरहेका छन्। हामी त्यो गर्दैनौं।” कम्पनीले मोराएसका “अवैध मागहरू र सबै सम्बन्धित अदालतका कागजातहरू” आगामी दिनहरूमा सार्वजनिक गर्ने योजना बनाएको बताएको छ।