अमेरिकी राष्ट्रपति चुनाव प्रभाव पार्न बनाइएको इरानी प्रयोगकर्ताको च्याटजीपीटी एकाउन्ट ओपनएआईद्वारा खारेज

काठमाडौं ।

च्याटजीपीटी निर्माता कम्पनी ओपनएआईले अमेरिकी राष्ट्रपति चुनाव र अन्य विषयहरूलाई प्रभाव पार्नको लागि आफ्नो च्याटबट प्रयोग गर्ने एक इरानी समूहका च्याटजीपीटी एकाउन्ट बन्द गरेको छ।

ओपनएआईले यस प्रकारका एकाउन्टहरु गत शुक्रबार बन्द गरेको अन्तर्राष्ट्रिय समाचार संस्था रोयटर्सले उल्लेख गरेको हो।

Storm-2035 नामको उक्त अपरेशनले अमेरिकी चुनावमा दुवै पक्षका उम्मेदवारहरूको बारेमा टिप्पणी, गाजा द्वन्द्व, र ओलम्पिक खेलमा इजरायलको उपस्थिति जस्ता विषयहरूमा सामग्री उत्पादन गर्न च्याटजीपीटीको प्रयोग गरेर सामाजिक सञ्जाल र वेबसाइटहरू मार्फत साझा गरिएको समाचारमा जनाइएको छ।

माइक्रोसफ्टद्वारा समर्थित उक्त एआई कम्पनीको अनुसन्धानले उक्त समूहले च्याटजीपीटीलाई लामो लेखहरू र छोटो सामाजिक सञ्जालका टिप्पणीहरू उत्पन्न गर्न प्रयोग गरिएको पत्ता लगाएको थियो थियो।

ओपनएआईका अनुसार उक्त अपरेशनमा खासै अडियन्सको संलग्नता भएको पाइएन। पहिचान गरिएका धेरै जसो सामाजिक सञ्जाल पोस्टहरूमा थोरै वा कुनै लाइक, शेयर वा टिप्पणीहरू नआएको र कम्पनीले वेब लेखहरू सामाजिक सञ्जालमा साझा गरिएको कुनै संकेत नदेखेको जनाएको छ।

हाल ती एकाउन्टहरूलाई ओपनएआईका सेवाहरू प्रयोग गर्न प्रतिबन्ध गरिएको छ भने कम्पनीले कुनै पनि नियम उल्लङ्घनका थप प्रयासहरू हुन्छन् किन भने निगरानी जारी राखेको उल्लेख छ।

अगस्ट महिनाको शुरुवातमा माइक्रोसफ्टले प्राप्त गरेको खतरा-सूचना प्रतिवेदनले इरानी नेटवर्क Storm-2035ले समाचार आउटलेटको नाम गरी चारवटा वेबसाइटहरू प्रयोग गरेर अमेरिकी मतदाताहरूसँग संवाद गरिरहेको पाइएको थियो।

प्रतिवेदनमा उक्त नेटवर्कले अमेरिकी राष्ट्रपति उम्मेदवारहरू, तेस्रो लिङ्गीका अधिकार तथा इजरायल-हमास द्वन्द्व जस्ता मुद्दाहरूमा ध्रुवीकरण हुने खालका सन्देशहरू प्रयोग गरी सम्पर्क बनाइरहेको उल्लेख गरिएको छ। आगामी नोभेम्बर ५ मा हुने राष्ट्रपती चुनावमा डेमोक्रेटिक उम्मेदवार कमला ह्यारिस र रिपब्लिकन प्रतिद्वन्द्वी डोनाल्ड ट्रम्प कडा प्रतिस्पर्धामा रहेका छन्।

ओपनएआईले गत मे महिनामा आफूले इन्टरनेटमा “छलपूर्ण गतिविधि”का लागि आफ्ना मोडेलहरू प्रयोग गर्ने पाँच गोप्य अपरेशनहरूलाई विफल पारेको जानकारी गराएको थियो।