टेलिकमका पूर्व एमडी अधिकारी ११ औं तहमा बढुवा, एमडी बन्न दरखास्त हालेका सिलवाल पनि सँगसँगै

काठमाडौं ।

नेपाल दूरसञ्चार कम्पनी लिमिटेडका पूर्व प्रबन्धक निर्देशक (एमडी) डिल्लीराम अधिकारी ११ औं तहमा बढुवा सिफारिस भएका छन्।

पूर्व एमडी अधिकारीलाई हालै टेलिकमको पदपूर्ति समितिले ११औं तहमा बढुवा गरेको हो। उनी यसअघि १० औं तहमा प्रबन्धकको रुपमा कार्यरत रहेका थिए।

अधिकारी प्रबन्ध निर्देशकको रुपमा नियुक्त हुँदा उनी १०औं तहमा नै कार्यरत रहेका थिए। जसले गर्दा तत्कालिन सञ्चार मन्त्री गोकुल प्रसाद बास्कोटाले जुनियरलाई एमडी बनाएको आरोपसमेत त्यसबेला लागेको थियो।

सरकारले एमडी नियुक्त गर्दानै कार्यकाल सकिएपछि स्वतः पुरानै पदमा फर्किन सकिने गरी अधिकारीलाई सुबिधा दिएको थियो। सोही कारण उनी फेरी प्रबन्धक पदमा हाजिर भई कार्यरत छन्।

यसअघिकै बढुवाको समयमा आफ्नो बढुवा नगरेको भन्दै अधिकारी रुष्ट भएका थिए। तर टेलिकम व्यवस्थापनले उनको कासमु फारामनै नभरिएको भन्दै बढुवा सूचीमा उनलाई राखेको थिएन्।

अधिकारीसँगै अहिले एमडी हुनका लागि दरखास्त हालेका प्रेम प्रसाद सिलवाल पनि अधिकृतस्तर ११‍ औं तहमा बढुवा भएका छन्। सूचनामा अधिकारीले ७७.११० प्राप्तांक हासिल गरेपनि सिलवालले कति प्राप्तांक पाए भन्ने उल्लेख छैन्।

सिलवालले केहि समयअघि सरकारले मागेअनुसार एमडी बन्नका लागि दरखास्त हालेका छन्, तर उक्त प्रकृया राजनीतिक खिचातानीका कारण हाल रोकिएको छ।

टेलिकमको रिक्त रहेको प्रमुख प्राविधिक अधिकृत/प्रमुख सञ्चालन अधिकृत/निर्देशक सेवा/समूह प्रा./टेलिकमका चार पद मध्ये अधिकारी र सिलवाल मात्र उक्त पदमा बढुवा भएको देखिन्छ। दुबैलाई कार्यक्षमता मूल्याङ्कन बढुवा सिफारिस गरिएको सूचनामा उल्लेख छ।

यस पदपूर्ति समितिको सूचना २३/२०८०/८१ अनुसार देहाय बमोजिमका विज्ञापनहरूमा कार्यक्षमता मूल्याङकन बढुवाद्वारा पदपूर्ति गर्न नेपाल दूरसञ्चार कम्पनी लिमिटेड कर्मचारी विनियमावली २०७८ (संशोधन सहित) को विनियम ३५ को उपविनियम २ बमोजिम आवश्यक सेवा अवधि एवं न्यूनतम शैक्षिक योग्यता हासिल गरेका रीतपूर्वक बढुवा दरखास्त फाराम दर्ता गर्ने सम्भाव्य उम्मेदवारहरूमध्ये सोको विनियमावलीको विनियम ३५ (१) बमोजिम उच्चतम अंक प्राप्त गर्नेहरुलाई बढुवा सिफारिस गरिएको हो।

यसैगरी टेलिकमले ११‍ औं तहको प्रमुख वित्तीय अधिकृत/नायब प्रबन्ध निर्देशक (आ.ले.प.), सेवा/समूह प्र./लेखा पदमा हालका प्रबन्धक द्वारिका प्रसाद पौडेललाई बढुवा गरेको छ भने प्रमुख व्यवसायिक अधिकृत (सीसीओ) पदमा सरिता श्रेष्ठलाई बढुवा सिफारिस गरेको छ।

टेलिकम स्रोतकाअनुसार पछिल्लो समय कम्पनी भित्र वरिष्ठ पदका लागि प्रतिस्पर्धी न्यून रहेका हुँदा आगामी दिनमा महत्वपूर्ण निर्णय गर्न कठिन हुने देखिन्छ। अहिलेका अधिकांश वरिष्ठ अधिकारीहरुसमेत उमेर हदका कारण रिटायर हुने समयमावधिमा रहेका हुँदा यी उच्च अधिकारीहरुले नै आगामी दिनमा टेलिकमको जिम्मेवारी सम्हाल्नुपर्ने बताईएको छ।