Technology Khabar ६ श्रावण २०८१, आईतवार
काठमाडौं ।
सरकारले सबै जनताहरुलाई अनलाइन प्रणालीबाटै हरेक सेवा उपलब्ध गराउने भएको छ।
प्रतिनिधिसभाको आजको बैठकमा विश्वासको मतको प्रस्ताव प्रस्तुत गर्दै सम्बोधनका क्रममा प्रधानमन्त्री केपी शर्मा ओलीले नेपालभित्र जुनसुकै भौगोलिक क्षेत्रमा बसोबास गर्ने नेपालीलाई राज्यले उपलब्ध गराउने नागरिकता, राष्ट्रिय परिचयपत्र र सवारी चालक अनुमतिपत्र अनलाइन प्रणालीबाट उपलब्ध गराउने व्यवस्था गर्ने बताए।
उनले भने, “त्यसबाहेक सवारीसाधन दर्ता ब्लुबुुक नवीकरण र घरजग्गालगायतका सम्पत्ति खरिद–बिक्री, कर, विद्युत्, खानेपानीलगायतका सरकारी शुल्क तथा कर लाइनमा बसेर होइन अनलाइनबाट तिर्ने व्यवस्था मिलाउनेछौँ । स्वास्थ्य तथा कृषि प्राविधिकलगायतका सेवाहरू पनि अनलाइन प्रणालीबाटै उपलब्ध हुनेछन्।”
यसैगरी सार्वजनिक सेवाप्रवाहको गुणस्तर र प्रभावकारिता बढाउने उनले जानकारी दिए।
प्रकाशित: ६ श्रावण २०८१, आईतवार
