स्मार्टवाचको प्रयोग घट्दो, ११ महिनामा ४ करोड रुपैयाँ बराबरले घट्यो आयात

काठमाडौं ।

नेपालमा स्मार्टवाचको आयात घट्दो क्रममा रहेको देखिएको छ। भन्सार विभागको आर्थिक वर्ष २०८०/८१ को जेठ मसान्तसम्मको वैदेशिक व्यापारको तथ्यांक अनुसार ३१ करोड ३ लाख ५९ हजार रुपैयाँ बराबरको स्मार्टवाच आयात भएको छ।

जेठ मसान्तसम्म उक्त रकम बराबरको २ लाख १६ हजार ७०७ थान स्मार्टवाच आयात भएको छ। गत आर्थिक वर्ष २०७९/८० को सोहि अवधि अर्थात् जेठ मसान्तसम्म ३५ करोड १५ लाख ७५ हजार रुपैयाँ बराबरको २ लाख ५९ हजार ४२० थान स्मार्टवाच आयात भएको थियो।

यसरी हेर्दा गत आर्थिक वर्षको सोही अवधिको तुलनामा चालु आवको ११ महिनामा स्मार्टवाचको आयात ४ करोड १० लाख रुपैयाँ अर्थात ३०.७३ प्रतिशतले घटेको छ।

यो तथ्याकलाई गोटा वा थानमा लैजाँदा यो अवधिमा स्मार्टवाचको आयात ४२ हजार ७१३ यूनिटले घटेको पाइएको छ। तर चालु आवको ११ महिनामा स्मार्टवाचको आयातबाट सरकारले ९ करोड ६२ लाख ६८ हजार रुपैयाँ राजश्व संकलन गरेको छ।

यस अवधिमा नेपालमा विश्वका विभिन्न ३१ मुलुक तथा नाम नखुलेको एक स्थानबाट स्मार्टवाच आयात भएको भन्सार विभागको तथ्यांकमा देखिन्छ।

तथ्याक अनुसार नेपालमा सबैभन्दा बढी स्मार्टवाच चीनबाट आयात भएको पाइएको छ। चीनबाट चालु आवको ११ महिनामा २४ करोड ८१ लाख ७८ हजार रुपैयाँ बराबरको २ लाख ४८ हजार १७८ थान स्मार्टवाच आयात भएको छ।

यसैगरी अर्को छिमेकी मुलुक भारतबाट ३ करोड ५१ लाख ८० हजार रुपैयाँ बराबरको २३ हजार ३२६ थान स्मार्टवाच आयात भएको तथ्याक छ। भियतनामबाट २ करोड ५२ हजार रुपैयाँ बराबरको ५६१ थान स्मार्टवाच भित्रिएको छ।

यी ३ देशबाहेक अन्य २८ देशबाट समग्रमा ६९ लाख ४९ हजार रुपैयाँको स्मार्टवाच आयात भएको पाइएको छ।