राजनीतिक खिचातानीले रोकिएको नेपाल टेलिकमको एमडी नियुक्ति प्रकृया अगाडि बढ्यो

काठमाडौं ।

सञ्चार तथा सूचना प्रविधि मन्त्रालयले नेपाल दूरसञ्चार कम्पनी लिमिटेड (नेपाल टेलिकम)को प्रबन्ध निर्देशक (एमडी) पदका लागि दरखास्त माग गरेको करिब १ महिना लागेसँगै प्रकृया शुरु गर्ने भएको छ।

सञ्चार तथा सूचना प्रविधि मन्त्रालयले जेठ २२ गते सूचना प्रकाशित गरेर दरखास्त मागेको थियो भने असार ६ गते उक्त पदका लागि १६ जनाको दरखास्त स्वीकृत गरेको थियो। अब, भने मन्त्रालयले यसको प्रकृया थप अगाडि बढाउने भएको हो।

मन्त्रालय स्रोतले एमडी नियुक्ति प्रकृया ढिलाई हुनुमा राजनीतिक कारण रहेको दाबी गरेको छ।

“पछिल्लो समय सरकारमा सहभागी दल एमालेले उक्त पदमा दाबी गरेसँगै नियुक्ति प्रकृया सुस्त भएको हो,” स्रोतले भन्यो, “सरकारमा रहेका प्रमुख दुबै दलले फरक-फरक व्यक्तिहरुलाई नियुक्त गर्ने चाहना राखेपछि प्रकृयामा ढिलाई भएको हो। अब, अन्तिमसम्म कस्को प्रभाव पर्छ अहिले भन्न सकिँदैन्।”

स्रोतकाअनुसार यसअघि नेपाल दूरसञ्चार प्राधिकरणको अध्यक्ष पदमा माओवादीले आफ्नो मान्छे नियुक्त गरेसँगै एमालेले नेपाल टेलिकमको एमडी पदमा आफूले चाहेको व्यक्ति नियुक्त गर्न खोजेको छ।

“यसमा विभिन्न खेमाका र पक्षका मान्छेहरुको दौडधुप जारी छ। त्यसैले अहिलेनै को हुन्छ र कसरी हुन्छ भन्न सकिँदैन्,” स्रोतले दाबी गर्यो।

मन्त्रालयले सार्वजनिक गरेको सूचनाअनुसार १६ जनालाई नै अन्तरवार्ता र व्यवसायिक कार्ययोजना प्रस्तुतिका लागि समय तोकिएको छ। यहि बिहिबार असार २० गतेदेखि अन्तरवार्ता तालिका तोकिएको छ।

मन्त्रालयले तीन दिनमा सो प्रकृया सम्पन्न गरेर प्रबन्ध निर्देशक पदका लागि ३ जनाको नाम सिफारिस गर्नेछ।

टेलिकमको एमडी पदका लागि दरखास्त दिनेमा राजेश जोशी, अनन्तप्रकाश मल्लिक, डा. विमल आचार्य, वर्तमान निमित्त एमडी संगीता पहाडी (अर्याल), प्रेम प्रसाद सिलवाल, चिन्ता मणि बराल, कृष्ण प्रसाद भण्डारी, अनिलकुमार झा, डा. ई. शालिग्राम पराजुली, लक्ष्मण महर्जन, ई. सुभाष साह, नगेन्द्रकुमार दास, केदार नाथ कोइराला, कमल लामिछाने, रमेश प्रसाद जोशी, ई.शालिक राम सुवेदी र बुद्धी प्रसाद आचार्य रहेका थिए।

यसअघि नै, दरखास्त दिने १७ जनामध्ये नेपाल टेलिकममै कार्यरत ईन्जिनियर सुभाष साहको योग्यता नपुगेपछि दरखास्त अस्वीकृत गरिएको थियो।

दरखास्त दिनेमा ४ जना बाहेक सबैजसो नेपाल टेलिकमसँग आबद्ध रहेका कर्मचारीहरु रहेका छन्।

दरखास्त दिएका मध्ये नेपाल टेलिकममै कार्यरत डा. विमल आचार्य र जनक शिक्षा सामाग्री केन्द्र लिमिटेडका प्रबन्ध निर्देशक रहेका अनिल कुमार झा चर्चामा रहेका छन्।

यसअघिका प्रबन्ध निर्देशक सुनिल पौडेल राष्ट्रिय सूचना प्रविधि केन्द्रको नेशनल पेमेन्ट गेटवेमा भ्रष्ट्राचार मुद्दामा दोषी ठहर भएसँगै टेलिकमको उक्त पद रिक्त रहेको थियो।

तत्कालिन समयमा, पौडेललाई नियुक्त गर्दा पनि तत्कालिन सञ्चार मन्त्री ज्ञानेन्द्र कार्की तथा तत्कालिन सञ्चार सचिव डा. बैकुण्ठ अर्यालले कार्यबिधिनै संसोधन गरेका थिए।