भारतमा रिलायन्स जियो र भारती एयरटेलले मोबाइल सेवाको मुल्य बढाए

काठमाडौं ।

छिमेकी देश भारतमा दुई प्रमुख मोबाइल अपरेटरहरु रिलायन्स जियो र भारती एयरटेलले मोबाइल सेवाको मुल्य बढाएका छन्। बिहिबार रिलायन्स जियोले नयाँ मूल्य घोषणा गरेकोमा आज शुक्रबारदेखि एयरलेटले समेत मोबाइलको शुल्क बढाएको छ जुन जुलाई ३ गतेदेखि लागू हुने भएको छ।

रिलायन्स जियोले मूल्यवृद्धि गरेपछि एयरटेलले टेलिकम ट्यारिफ बढाउने निर्णय गरेको हो। यो कदम प्रति प्रयोगकर्ता औसत राजस्व (आर्पु-ARPU) वृद्धि गर्ने उद्देश्यले गरिएको छ। एयरटेलले ट्यारिफ बढाएपछि प्रिपेड प्लानका लागि भारतीय ग्राहकहरुले थप मूल्य तिर्नुपर्ने भएको छ।

भारती एयरटेलले भारतमा दूरसञ्चार कम्पनीहरूका लागि आर्थिक रूपमा राम्रो व्यापार मोडेललाई कायम राख्न प्रति प्रयोगकर्ता औसत मोबाइल राजस्व आर्पु भारु ३०० भन्दा बढी हुनुपर्ने बताएको छ। आर्पुको यो स्तरले नेटवर्क टेक्नोलोजी र स्पेक्ट्रममा आवश्यक लगानी जारी गर्नेछ र पूँजीमा सामान्य प्रतिफल दिने बताएको छ।

एयरटेलले जुलाई ३ देखि आफ्नो मोबाइल ट्यारिफहरू परिमार्जन गर्नेछ।

एयरटेलले १७९ भारतीय रुपैयाँको प्रिपेड प्लानलाई १९९ रुपैयाँ, ४५५ रुपैयाँको प्लानलाई ५९९ रुपैयाँ र १,७९९ रुपैयाँको प्रिपेड प्लानलाई १९९९ भारतीय रुपैयाँमा बढाएको छ।

एयरटेलले दैनिक डाटा प्लानको मूल्य समेत बढाएको छ, जसअनुसार एयरटेलले सबैभन्दा सस्तो २६५ भारतीय रुपैयाँको प्लानलाई २९९ रुपैयाँमा बढाएको छ। यस्तै सबैभन्दा महँगो २,९९९ रुपैयाँको प्लानको मूल्य बढाएर ३,५९९ रुपैयाँ बनाएको छ।

दैनिक प्रयोग हुने एक दिनको वैधतामा १ जीबी डाटाको २९ रुपैयाँको प्लान अब ३३ रुपैयाँमा उपलब्ध हुनेछ।

रिलायन्स जियोले पनि बढायो मूल्य

रिलायन्स जियोले बिहीबार ट्यारिफमा परिवर्तन र नयाँ असीमित योजनाहरू लन्च गर्ने घोषणा गरेको थियो। जियोले मोबाइल ट्यारिफमा १२-२७ प्रतिशत वृद्धि गरेको घोषणा गर्यो, जुन साढे दुई वर्षमा पहिलो पटक हो।

जियोकाअनुसार याँ मूल्यहरू जुलाई ३ तारिखदेखि लागू हुनेछन्। जियोको सबैभन्दा सस्तो प्रिपेड प्लान भारु १५५ को २८ दिनको वैधताको प्रिपेड रिचार्ज अब भारु १८९ भएको छ। त्यसैगरी, २८ दिनको वैधताको साथ ३९९ रुपैयाँको प्रिपेड रिचार्ज (जियो प्रिपेड रिचार्ज प्लान मूल्य) अब ४४९ रुपैयाँ हुनेछ।

कम्पनीले वार्षिक प्रिपेड रिचार्जको मूल्य पनि बढाएको छ। २,९९९ को ३६५ दिनको प्रिपेड रिचार्ज अब भारु ३५९९ हुनेछ।

जियोले लगभग सबै रिचार्ज प्लान महँगो बनाएको छ। २८ दिनको समयावधि भएको १५५ भारतीय रुपैयाँको प्रिपेड रिचार्ज ३४ रुपैयाँले बढेर १८९ रुपैयाँ पुगेको छ। यसैगरी सबैभन्दा महंगो भारु ३९९ को २८ दिनको प्रिपेड रिचार्ज अब ४४९ भारतीय रुपैयाँ लाग्नेछ।

जियोले अतिरिक्त डाटाको लागी उपलब्ध योजनाहरुमा डाटाको मूल्य पनि संशोधित गरिएको छ। १५ भारतीय रुपैयाँको १ जीबी डाटा प्लान अब १९ रुपैयाँ लाग्नेछ। २५ रुपैयाँको योजना २९ रुपैयाँ हुने रिपोर्टमा उल्लेख छ।