Technology Khabar १४ असार २०८१, शुक्रबार
काठमाडौं ।
काठमाडौं महानगरपालिका(कामनपा) ले कक्षा ११ मा छात्रवृत्ति कोटामा अध्ययन गर्न चाहने विद्यार्थीहरूका लागि अनलाइन आवेदन खुलाएको छ।
नगर कार्यपालिकाको कार्यालयले जारी गरेको सूचनाअनुसार, काठमाडौँ महानगरपालिका अन्तर्गतका संस्थागत शिक्षण संस्थामा कक्षा ११ मा भर्ना भई छात्रवृत्तिमा कोटामा अध्ययन गर्न चाहने विद्यार्थीहरूलाई परीक्षा प्रणालीबाट छात्रवृत्ति उपलब्ध गराइनेछ।
यसका लागि तोकिएको तालिका बमोजिम परीक्षा सञ्चालन हुने जानकारी दिएको छ।
यसको लागि महानगरपालिकाको वेबसाइट वा entrance.kathmandu.gov.np मार्फत अनलाइन आवेदन दिन सकिने व्यवस्था मिलाइएको उल्लेख छ।
यसैगरी परीक्षामा सोधिने प्रश्नका विषय र क्षेत्र माध्यमिक तह कक्षा १० को पाठ्यक्रममा आधारित १०० ओटा बहु वैकल्पिक वस्तुगत हुनेछन्।
अनलाइन आवेदन फाराम भर्ने अवधि मिति २०८१ असार १५ गते बिहान १०:०० बजेदेखि शुरु भएर अनलाइन आवेदन फाराम भर्ने अन्तिम मिति असार २९ गते शनिबार राती ११:५९ बजेसम्म तोकिएको छ।
यस परीक्षा सञ्चालन हुने मिति २०८१ श्रावण ४ पुनश्च : विद्यालयगत छात्रवृत्तिको फोटा र परीक्षा केन्द्र सम्बन्धी अन्य विवरण पछि प्रकाशन गरिनेछ।
सूचनाअनुसार परीक्षा सञ्चालन हुने मिति २०८१ श्रावण ४ गते तोकिएको छ, जसमा विज्ञान व्यवस्थापन मानविकी शिक्षा र कानून विषयमा अध्ययन गर्न चाहनेहरु समावेश हुनेछन्।
महानगरपालिकाले विद्यालयगत छात्रवृत्तिको फोटा र परीक्षा केन्द्र सम्बन्धी अन्य विवरण पछि प्रकाशन गरिने जनाएको छ।
छात्रवृत्तिको नतिजा प्रकाशन भएपश्चात् मात्र भर्ना हुन विद्यार्थीहरूलाई अनुरोध गरेको छ।
प्रकाशित: १४ असार २०८१, शुक्रबार
