दूरसञ्चार कम्पनीहरुका युनियन कर्मचारीहरुद्वारा दूरसञ्चार क्षेत्रको चिन्ता

काठमाडौं ।

दूरसञ्चार क्षेत्र समस्याग्रस्त भएको कर्मचारी युनियनका प्रतिनिधिहरुले बताएका छन्।

राजधानीमा आइतबार नेपाल दूरसञ्चार प्राधिकरण स्वतन्त्र कर्मचारी युनियनको वार्षिकोत्सवको अवसरमा आयोजित “वार्षिकोत्सव समारोह तथा ८औँ स्मारिका प्रकाशन२०८१” कार्यक्रममा युनियनका प्रतिनिधिहरुले नियामकले स्पष्टरुपमा नियमन र अनुगमन गर्नुपर्ने बताएका थिए।

कार्यक्रममा नेपाल टेलिकम वर्कर्स युनियनका महासचिव लोकेन्द्र पनेरुले प्राधिकरणले ध्यान नदिँदा इन्टरनेट सेवा प्रदायकहरुले गर्दा टेलिकम अपरेटरहरु डुब्ने अवस्था आएको बताए।

“एनटीसीलाई मात्रै अत्यन्तै ठूलो लिभरेज दिईयोस् र अरु सेवा प्रदायकलाई केही बढी दमन होस् भन्ने हामी चाहँदैनौं। तर इक्वल (समान) फुटिङ चाँहि हुनु पर्यो। ३ लाखमा लाइसेन्स लिने, नेपाल टेलिकम र नेपाल विद्युत प्राधिकारणका पोल पोलमा हटस्पट राखिदिने र त्यो बापत करोडौँ रुपैँया दैनिक कमाउने, अरबौँ वार्षिक कमाउने। एउटा सेवा प्रदायक डुब्यो, त्यसको रिचाजै कार्ड पनि बजारमा गको छ, डिलरहरु पनि डुब्यो, त्यसको सेवा लिने जनताहरु पनि डुब्नेछन्।”

यस्तै स्वतन्त्र एनसेल कर्मचारी ट्रेड युनियनका अध्यक्ष सुरेस प्रसाद पौडेलले दूरसञ्चार क्षेत्रलाई घरको उदाहरण दिँदै भने, “पहिले सुरुमा आम्दानी घट्यो भन्ने मात्रै चिन्ता थियो तर अब भोलि के हुन्छ भन्ने चिन्ताले पनि ग्रसित बनाउन थालेको छ। किनभने दुरसञ्चार एउटा सिंगो घर हो भने हामी त्यहाँ सेवा प्रदायकहरु विभिन्न कोठामा बसेका थियौँ। पहिला त्यही घरमा ५–६ ओटा कोठा थिए भने अहिले २ ओटा मात्रै कोठामा सिमित भएको छ। हामी सबैजना एउटै घरमा छौँ र सबै मिलेर बस्न सकौँ र सबैको समस्या एउटै हो।”

दुरसञ्चार प्राधिकरणको कर्मचारी युनियनले आफ्नो स्थापना दिवशको अवसरमा स्मारिका प्रकाशन गरेको छ। नेपाल दुरसञ्चार प्राधिकरणका बोर्ड सदस्य रविन्द्र झाले उक्त “स्मारिका प्रकाशन २०८१” को विमोचन गरेका थिए।