सामाजिक सञ्जाल टिकटकलाई कानूनी दायरामा ल्याउने प्रयास भईरहेको सञ्चार मन्त्रीको भनाई

काठमाडौं ।

सरकारले सामाजिक सञ्जाल टिकटकलाई कानूनी दायरामा ल्याउने प्रयन्त भइरहेको जनाएको छ।

राष्ट्रियसभा अन्तर्गतको विकास, आर्थिक मामिला तथा सुशासन समितिको सिंहदरबारमा बिहीबार बसेको बैठकमा सञ्चार तथा सूचना प्रविधिमन्त्री रेखा शर्माले टिकटक नभई त्यसमा आउने कन्टेन्ट प्रति समस्या रहेको भन्दै टिकटकलाई कानूनी दायरामा ल्याउने प्रयन्त भइरहेको जानकारी गराईन्।

उनले नेपालको कानूनी व्यवस्थाका आधारमा दर्ता भइ सञ्चालन भएमा टिकटक प्रति कुनै प्रतिबन्ध नहुने स्पष्ट पारिन्।

शर्माले बुधबार मात्रै फेसबुकका प्रतिनिधिसँग छलफल भएको र नेपालको नियमकानून अनुसार चल्नुपर्नेमा जोड दिएको धारणा राखिन्।

मन्त्री शर्माले आगामी मन्त्रिपरिषद बैठकले सामाजिक सञ्जाल विधेयकलाई संसदमा पठाउने र त्यसपछि बृहत छलफल गर्दै यसलाई पारित गर्ने जानकारी दिइन्।

उनले नेपालको सार्वजनिक व्यवस्थापनमा शासकीय सुधार तथा सुशासन प्रबर्द्धन गराउन सुचनाको हक कार्यान्वयनमा सरकारले जोड दिएको पनि बताइन्।

त्यस्तै शर्माले सुचनाको हक सम्बन्धी ऐन कार्यान्वयनका लागि अन्तरमन्त्रालय समन्वय, अनुगमनका साथै नागरिकको सूचनामा सहज पहुँचका लागि पनि ध्यान दिइएको उल्लेख गरिन्।