फेसबुकको मालिक मेटाको आम्दानी १६ प्रतिशतले बढ्यो, मेटाभर्स युनिटमा घाटामा

काठमाडौं ।

विश्वभर लोकप्रिय सामाजिक सञ्जाल फेसबुक चलाउने मेटाको राजस्व गत वर्ष १६ प्रतिशतले बढेर १३४.९ अर्ब डलर पुगेको छ। गत वर्षको चौथो त्रैमासिकमा कम्पनीको राजस्व ४०.१ अर्ब डलर थियो।

कम्पनीका प्रमुख मार्क जुकरबर्गले राजस्वको हिसाबले गत वर्ष राम्रो रहेको बताएका छन्।

तर, कम्पनीको रियालिटी ल्याब युनिट विगत तीन वर्षदेखि घाटामा छ। जुकरबर्गले भने, “गत वर्षको चौथो त्रैमासिकमा हाम्रो व्यापार र समुदाय बढेको छ। हामीले एआई र मेटाभर्समा ठूलो प्रगति गरेका छौं।”

फेसबुकलाई करिब तीन वर्षअघि मेटाको रूपमा पुन: ब्रान्ड गरिएको थियो। जुकरबर्गले मेटाभर्समा सम्भावनाहरू खोज्ने योजनाको बारेमा पनि जानकारी दिएका थिए। यसका लागि नयाँ इकाई रियालिटी ल्याबहरू सिर्जना गरिएको छ।

विगत तीन वर्षमा, रियालिटी ल्याब्सले मेटाभर्स र अगुमेन्टेड रियालिटी (एआर) सँग कनेक्सन भएको क्वेस्ट भीआर जस्ता हार्डवेयर उत्पादनहरू लन्च गरेको छ। गत वर्ष मार्च सम्म, मेटाले क्वेस्ट हेडसेटको लगभग २ करोड एकाइहरू बेचेको थियो।

मेटा र गुगल जस्ता ठूला टेक्नोलोजी कम्पनीहरूले केही देशहरूमा नियमहरूको पालना नगरेका कारण कठिनाइहरूको सामना गरिरहेका छन्।