एप्पलको वार्षिक राजस्व भारतबाट ४२ प्रतिशतले बढेर ८.७ बिलियन डलर पुग्यो

काठमाडौं ।

अमेरिकी ब्रोकरेज मोर्गन स्टेनलीले शुक्रबार जारी गरेको प्रतिवेदनमा भारतमा एप्पलको राजस्व गत वर्ष झण्डै ४२ प्रतिशतको वार्षिक दरले बढेर ८.७ बिलियन डलर पुगेको बताएको छ।

रिपोर्टका अनुसार गत वर्ष आईफोनको बिक्री करिब ३९ प्रतिशतले बढेर ९२ लाख युनिट पुगेको थियो।

“भारतले क्यालेन्डर वर्ष २०२३ मा आईफोनको बिक्रीमा चार प्रतिशत र राजस्वको लगभग ४ प्रतिशत योगदान गर्यो। यो २०२२ मा तीन प्रतिशत र पाँच वर्ष अघि एक प्रतिशत थियो,” विश्लेषकहरूले रिपोर्टमा भनेको टेकक्रन्चले लेखेको छ।

“यदि भारत यो गतिमा बढ्दै गयो र चीनमा आईफोन ढुवानी स्थिर रह्यो भने, २०२७ सम्ममा यो देश चीन भन्दा ठूलो आईफोन बजार हुनेछ,” यसले भन्यो।

एप्पलले भारतमा डिसेम्बर त्रैमासिकमा बलियो दोहोरो अंकको वृद्धि रिपोर्ट गरेको छ, जसले देशमा अर्को त्रैमासिक राजस्व रेकर्ड कायम गरेको छ, कम्पनीका सीईओ टिम कुकले यस महिनाको सुरुमा भनेका थिए।

एक विश्लेषकको प्रश्नको जवाफ दिँदै कुकले भारतीय बजारले कुनै पनि त्रैमासिकको राजस्व रेकर्ड तोडेको बताएका थिए।

सन् २०२३ मा भारतमा स्मार्टफोनको बिक्री १५२ मिलियन युनिटमा स्थिर रह्यो, तर एप्पलको बिक्री १० मिलियन युनिटमा पुग्यो र यसले पहिलो पटक क्यालेन्डर वर्षमा राजस्वमा शीर्ष स्थानमा पुग्यो।

मुलुकमा मोबाइल उत्पादनलाई थप प्रवद्र्धन गर्न भारतीय सरकारले जनवरीमा मोबाइल फोन उत्पादनमा प्रयोग हुने पार्टपुर्जाको आयात शुल्क १५ प्रतिशतबाट घटाएर १० प्रतिशतमा झारेको थियो।

यस कदमले एप्पल जस्ता कम्पनीहरूलाई देशमा उनीहरूको हाई-इन्ड प्रिमियम स्मार्टफोनहरू उत्पादन गर्न मद्दत गर्नेछ।