प्रेस काउन्सिलले पत्रकारलाई ल्यापटप र क्यामरा खरिदमा अनुदान दिने

काठमाडौं ।

प्रेस काउन्सिल नेपालले मिडियाहरुको क्षमता अभिवृद्धि गर्ने योजनाअनुसार ल्यापटप र क्यामरा खरिदमा पत्रकारलाई अनुदान दिने भएको छ।

काउन्सिलले मिडिया विकास कोषको स्वीकृत नीति एवम् बजेट तथा कार्यक्रमअनुसार आर्थिक वर्ष २०८०/८१ का लागि अनुदान कार्यक्रम तय गरेको हो।

काउन्सिलले आइतबार जारी गरेको सार्वजनिक सूचनाअनुसार ३० ओटा ल्यापटप खरिदका लागि अनुदान दिन लागिएको जनाएको छ। अनुदान एक ल्यापटप बराबर ४० प्रतिशत उपलब्ध गराइनेछ।

यसैगरी ६ ओटा क्यामरा खरिदमा ३० देखि ४० प्रतिशत अनुदान दिन लागेको छ भने १० जनालाई लेखनवृत्ति, ७ जनालाई सोधपत्र लेखनमा सघाउनेछ।

यसका साथै एक सञ्चारकेन्द्र स्थापनामा पनि अनुदान दिने काउन्सिलले जनाएको छ।

काउन्सिलको सूचनाअनुसार एक पत्रकार वा सञ्चारगृहबाट एक मात्र सुविधाका लागि आवेदन दिन सकिनेछ।

दुर्गम, स्थानीय सञ्चारमाध्यम र यसअघि उपलब्ध नभएका जिल्लालाई पहिलो प्राथमिकता दिइने भन्दै काउन्सिलले ३५ दिनभित्र आवेदन दिन सकिने जनाएको छ।