ह्वावेले फाइभजी जटिलताका कारण यूराेपेली बजारमा कठिनाइको सामना गर्दै

काठमाडौं ।

युरोपले ५जी रोलआउटको जटिलताहरू हटाउने क्रममा, जर्मनी चिनियाँ टेक दिग्गज ह्वावे र जेडटीईलाई आफ्नो नेटवर्कबाट बाहिर राख्ने विचार गर्ने सबैभन्दा नयाँ देश हो।

जर्मनीको आन्तरिक मन्त्रालयले २०२६ सम्म यी निर्माताहरूबाट महत्वपूर्ण हार्डवेयर हटाउन सुझाव दिइरहेको रोयटर्सको रिपोर्टमा उल्लेख छ।

यसअघि जर्मनीले ह्वावेबाट आफूलाई टाढा राख्न अमेरिकी अनुरोधहरूलाई अस्वीकार गरेको थियो।

जर्मनीको यो निर्णय चीन र अमेरिकाको बीचमा चलिरहेको प्राविधिक शीतयुद्धको अर्को घटना मात्र नभएर यसको फराकिलो प्रभाव रहेको छ। जर्मनी युरोपको सबैभन्दा ठूलो अर्थतन्त्र मात्र नभई, ईयूमा चीनको सबैभन्दा महत्वपूर्ण व्यापारिक साझेदार पनि हो।

युरोपियन काउन्सिल अन फरेन रिलेसन्सका जानकार ओरटेलका अनुसार जर्मनीको ५जी पूर्वाधारको ६५ प्रतिशत ह्वावे कम्पोनेन्टहरू प्रयोग गरेर निर्माण गरिएको बताइएकाे छ।

यहाँकाे कुनै पनि परिवर्तनले युरोपको टेलिकम अर्थतन्त्रमा प्रभाव देखाउन सक्ने उल्लेख छ। हालैको एक रेडियो अन्तर्वार्तामा, ह्वावेका कार्यकारी कार्स्टेन सेन्जले जर्मनीमा वर्षौंदेखि कुनै पनि सुरक्षा समस्या बिना ह्वावेको प्रविधि प्रयोग गरिएको कुरा औंल्याए।

कम्पनीले यो प्रतिबन्धले जर्मनीका टेलिकम अपरेटर र उपभोक्ता दुवैको लागत बढाउने चेतावनी दिएको छ। ह्वावेकाे तर्क आर्थिक नतिजाहरू वरिपरि केन्द्रित हुँदा, इयूले आफ्ना सदस्यहरूलाई सतर्क रहन आग्रह गरिरहेको गिज्माेचाइनामा उल्लेख छ।

२०२० मा, इयूले ५जी रोलआउटहरूमा ह्वावेकाे संलग्नतालाई प्रतिबन्ध लगाउन सिफारिस गर्यो। यद्यपि, इयू राष्ट्रहरूको एक तिहाइले मात्र हालसम्म यसलाई अनुसरण गरेका छन्।

यदि जर्मनीले प्रतिबन्धको पालना गरेमा, यसले डोमिनो प्रभावलाई उत्प्रेरित गर्न सक्ने तथा, अन्य युरोपेली राष्ट्रहरूलाई उनीहरूको ५ जी साझेदारीमा पुनर्विचार गर्न दबाब दिने बताइएकाे छ।