काठमाडौं ।
पुराना विशेष वस्तुहरूको लिलामीको बारेमा तपाईले धेरै पटक सुन्नु भएको छ। यी सिक्का, मूर्तिहरू, वा अन्य धातु वस्तुहरू हुन सक्छन्। तिनीहरूको मूल्य पनि लाखौंमा जान्छ। तर कसैको हस्ताक्षर भएको चेक १ करोड भन्दा धेरै मूल्यमा बेच्न सकिन्छ ? यो भएको थियो।
एप्पलका सीईओ तथा सह-संस्थापक स्टिभ जब्सले हस्ताक्षर गरेको चेक १ लाख ६ हजार ९८५ डलरमा बिक्री भएको छ। जुन नेपाली मुद्रा अनुसार करिब १ करोड ४० लाख ७० हजार ७५२ रुपैयाँ हुने गर्छ। अर्थात् यो चेक करिब १ करोड ४१ लाख रुपैयाँमा बिक्री भएको छ।
आखिर यो कागजको टुक्रा यति महँगो बिक्नुको कारण के होला !
स्टिभ जब्सलाई विश्वको बिजनेस म्याग्नेट भनेर चिनिन्छ। सन् १९७६ मा एप्पलका प्रमुख कार्यकारी अधिकृतले हस्ताक्षर गरेको चेक १ लाख डलरभन्दा बढीमा बिकेको हो। म्याक्रोमर्सको रिपोर्टअनुसार, भर्खरै आरआर अक्सनद्वारा लिलामी गरिएको थियो जसमा यो चेकले बोलपत्रदाताहरूको ध्यान खिच्यो। यसको मूल्य १ करोड ४१ लाख रुपैयाँसम्म पुगेको थियो। स्टिभ जब्सले क्राम्प्टन, रिम्की, मिलर, आईएनसीको लागि यो चेकमा हस्ताक्षर गरेका थिए। यो चेक विशेष थियो किनभने एप्पल अप्रिल १, १९७६ मा सुरु भएको थियो, जुन एप्पल कम्प्युटर इंक नामले भएको थियो र यसलाई स्टीव जब्स र स्टीव वोज्नियाकले मिलेर बनाएका हुन्।
यो चेक विशेष हुनुको अर्को प्रमुख कारण यसमा छापिएको ठेगाना हो। यसमा ठेगाना लेखिएको छ – ७७० वेल्च आरडी., स्टी १५४, पालो अल्टो, जुन एप्पलको पहिलो आधिकारिक ठेगाना हो।
अझ रमाईलो कुरा भनेको उक्त चेकमा १ सय ७५ डलर मात्रै भरिएको छ, जुन आजको डलरको मूल्य अनुसार करिब २२ हजार ७५० रुपैयाँ मात्रै हुन्छ। यो चेक ८ जुलाई, १९७६ को हो र स्टीव जब्सद्वारा हस्ताक्षर गरिएको छ।
चेक वास्तविक भएको र यसमा हस्ताक्षर पनि स्टिभ जब्सको रहेको बताइएको छ। स्टिभ जब्सले हस्ताक्षर गरेको चेक बेचेको यो पहिलो पटक होइन। यसअघि सन् २०२२ मा स्टिभ जब्स र स्टिभ वोज्नियाकले हस्ताक्षर गरेको चेक १ लाख ६४ हजार डलरमा बिक्री भएको थियो।
प्रकाशित: १ जेष्ठ २०८०, सोमबार
