काठमाडौं ।
यो आर्टिफिसियल इन्टेलिजेन्सको जमाना हो र विश्वभरका कम्पनीहरूले यस प्रविधिलाई कुनै न कुनै रूपमा आफ्नो फाइदाको लागि प्रयोग गर्न चाहन्छन्।
अब आउँदा दिनमा एआईले विमान पनि उडाएको देख्ने संभावना देखिन्छ, किनभने एमिरेट्स एयरलाइन्सको पनि यस्तै मनसाय रहेको छ। सो एयरलाइन्सका अध्यक्षले भर्खरै एआई को-पाइलटेड यात्रु विमानहरूले भविष्यमा यात्रुहरूलाई उनीहरूको गन्तव्यमा पुर्याउन सक्ने बताएका छन्।
सीएनबीसीसँगको कुराकानीमा, एमिरेट्सका अध्यक्ष टिम क्लार्कले भने, “हामी निकट भविष्यमा एआई को-पाइलटहरूले विमानहरू उडान गरिरहेको देख्न सक्छौं। तपाईले एक पाइलट विमान देख्न सक्नुहुन्छ। के विमान पूर्ण स्वचालित आधारमा उडान गर्न सकिन्छ? हो, यो हुन सक्छ, प्रविधि त्यहाँ छ।”
उनले थपे, “(तर यात्रुहरू) माथि दुई जना पाइलट छन् भन्ने सोच्न मन पराउँछन्। मेरो विचारमा उडानको डेकमा सधैं कोही हुनुपर्छ।”
पूर्णतया पायलटविहीन विमानहरूको विषयमा, क्लार्कले यो सम्भव छ तर धेरै टाढा भएको बताए। उनले थपे कि उनले आफ्नो जीवनकालमा यो हुनेछ भन्ने सोचेका थिएनन्।
उता ककपिटमा पाइलटको कति इनपुट हुन्छ भन्ने कुरालाई रेखांकित गर्दै, हालै, पाइलट युनियन ‘बाल्पा’का उडान सुरक्षा प्रमुख जोजी वेट्सले एक ब्लगमा लेखे, ‘कुशल पाइलट जटिल सुरक्षा प्रणालीको हिस्सा हो जसले जोखिमलाई कम गर्छ र यात्रुहरूलाई सुरक्षित राख्छ।’ उनका अनुसार यात्रु, चालक दल र कार्गोलाई सुरक्षित गन्तव्यमा पुर्याउने काम गर्ने अत्यावश्यक सुरक्षा प्रणालीको हिस्सा भएकाले पाइलटलाई विमानको पाइलट मात्रै मान्न सकिँदैन।
उनले पाइलटहरू नेभिगेटर, इन्जिनियर, प्राविधिक, मौसमविद् र ग्राहक सेवा प्रबन्धक हुनुपर्ने बताए।
एयरलाइन्स उद्योगमा आर्टिफिसियल इन्टेलिजेन्सको प्रवेश आगामी समयमा आउनेछ भन्ने प्रष्ट छ, तर अहिले नै दक्ष मानव पाइलटभन्दा राम्रो मान्ने कि नमान्ने भन्नेमा ठूलो बहस भइरहेको छ।
अटोनोमस अर्थात स्वायत्त विमान बजार हाल आफ्नो बाल्यावस्थामा छ, यद्यपि केही स्टार्टअपहरू भविष्यका लागि पायलटविहीन विमानहरू विकास गर्नमा केन्द्रित छन्।
प्रकाशित: ३१ बैशाख २०८०, आईतवार
