काठमाडौं ।
फाइभजी मोबाइल नेटवर्क भित्रिएपछि विश्वका सबै देशले सिक्सजीको तयारी गर्न थालेका छन्। यसैबीच छिमेकी राष्ट्र चीनले आफ्नो ५जी नेटवर्कलाई तिब्र गतिमा विस्तार गरिरहेको छ र ६जीको तयारी पनि सुरु भएको छ।
एक रिपोर्टका अनुसार चीनको तेस्रो ठूलो वायरलेस नेटवर्क अपरेटर ‘चाइना युनिकम’ले सन् २०२५ सम्ममा ६जी प्रविधिसँग सम्बन्धित प्राविधिक अनुसन्धान र प्रारम्भिक एपहरू सञ्चालनमा ल्याउने आशा व्यक्त गरेको छ। प्रतिवेदनले चीनमा सिक्सजी मोबाइल नेटवर्कको रोलआउट अर्को दशकको सुरुमा सुरु हुने अपेक्षा गरेको छ।
स्वीजरल्याण्डको डाभोसमा भएको विश्व आर्थिक मञ्चको शिखर सम्मेलनमा चाइना युनिकमका अध्यक्ष र सीईओ लिउ लिहोङले उक्त समयरेखा खुलासा गरेका साउथ चाइना मर्निङ पोस्टले रिपोर्ट गरेको छ। सम्मेलनमा सहभागी लिउले सन् २०२५ सम्ममा चीनमा प्रारम्भिक ६जी “एप्लिकेशन परिदृश्य” ल्याइने बताए।
उनले भने, ‘चीन सबैभन्दा ठूलो इन्टरनेट प्रयोगकर्ता जनसंख्या भएको र विश्वको सबैभन्दा ठूलो स्मार्टफोन बजार भएको देश हो। चीनमा सन् २०१९ देखि ६जीमा अनुसन्धान भइरहेको छ। चिनियाँ सञ्चारमाध्यमका अनुसार सन् २०३० देखि देशमा सिक्सजीको व्यावसायिक सुरुवात हुने अपेक्षा गरिएको छ।
विश्व आर्थिक मञ्चमा सहभागी भएका चीनका उद्योग तथा सूचना प्रविधि मन्त्री जिन झुआङलोङले पनि ६जीमा बोलेका थिए । उनले सिक्सजी सम्बन्धी अनुसन्धान र विकासमा चीन विश्वभर अग्रणी रहेको बताए। चीनमा २२ देखि २४ मार्चसम्म सिक्सजी सम्बन्धी सम्मेलन पनि भएको थियो। उक्त सम्मेलनमा दूरसञ्चार क्षेत्रका सबै विज्ञहरुको सहभागिता रहेको थियो।
सन् २०३० सम्ममा चीनमा ६जी मोबाइल सेवा सुरु हुने सबैको साझा धारणा बनेको छ। रिपोर्टका अनुसार चीनमा ३ टेलिकम नेटवर्क अपरेटर ६जीसँग सम्बन्धित अनुसन्धानमा संलग्न छन्। जसमा चाइना मोबाइल, चाइना टेलिकम र चाइना युनिकम रहेका छन्।
विशेष कुरा के छ भने विश्वका अन्य देशले पनि ६ जीसँग सम्बन्धित अनुसन्धान थालेका छन् र फाइभजी मोबाइल नेटवर्कको रोलआउटमा चिनियाँ प्रविधि कम्पनीहरूलाई प्राथमिकता दिइरहेका छैनन्।
प्रकाशित: १७ चैत्र २०७९, शुक्रबार
